Երեւանի օղակաձեւ այգին վերածվել է «օղակաձեւ ռեստորանի»
Երեւանի օղակաձեւ այգին վերածվել է «օղակաձեւ ռեստորանի»։ Այս մասին NEWS. am-ի թղթակցի հետ զրույցում ասաց բնապահպան, բնապահպանության նախկին նախարար Կարինե Դանիելյանը։
«Օղակաձեւ այգին հենց այդ նպատակով է ստեղծվել՝ քաղաքի կենտրոնի համար բնապահպանական բեռնաթափում ապահովելու։ Մի կողմից լավ է, որ ծառերն անցած տարիների ընթացքում աճել են։ Մյուս կողմից էլ իրավիճակը հիմա ավելի շատ «օղակաձեւ ռեստորան» է հիշեցնում կամ «օդակաձեւ սրճարան»,- նշեց բնապահպանը։
Նրա խոսքով՝ քաղաքային այգիների իմաստն այն է, որ մարդիկ լռության մեջ, անվճար, հանրային տարածքում կարողանան հանգստանալ կամ մաքուր օդ շնչել։ «Լռությունն այնտեղ անհնար է, բարձր երաժշտություն է հնչում ամենուրեք։ Տարածքը լցված է զանազան ժամանցային միջոցառումներով։ Ես համեմատում եմ իմ զբոսանքները դստերս հետ եւ թոռնուհուս հետ։ Դստերս հետ զբոսանքն անվճար էր: Թոռնուհուս հետ այլ իրավիճակ է։ Երեխան տեսնում է բազմաթիվ կարուսելներ, խաղեր, ուզում է։ Բայց չէ՞ որ կան ծնողներ, որոնք ի վիճակի չեն վճարել դրա համար, իսկ Երեւանում արդեն, փաստորեն, չի մնացել կանաչ գոտու մի կտոր, որտեղ ծնողը կարողանա զբոսնել երեխայի հետ՝ չծախսելով մեծ գումարներ»,- նկատեց Կարինե Դանիելյանը։