Մարիա Զախարովան զարմացած է Թուրքիայում հայկական եկեղեցիները վաճառքի հանելուց

ՌԴ արտգործնախարարության պաշտոնական ներկայացուցիչ Մարիա Զախարովայի ճեպազրույցի ժամանակ Հանրային հեռուստաընկերության լրագրողի բարձրաձայնած երկրորդ հարցը հետևյալն է.

Թուրքիայում երկու հայկական եկեղեցիներ վաճառքի են հանվել, շատ են եկեղեցիների, հուշարձանների ոչնչացման դեպքերը: Մշակութային վանդալիզմի ֆոնին տարածաշրջանում խաղաղություն և կայունություն հաստատելու մասին հայտարարությունները կարո՞ղ են արդյոք հավատ ներշնչել:
«Չեմ կարող որևէ գնահատական տալ անշարժ գույքի օբյեկտների վաճառքի վերաբերյալ, սակայն, ինչ-որ պահի ինձ համար էլ զարմանալի էր, որ աշխարհում մշակութային օբյեկտների վաճառքի պրակտիկա կա: Դեպքեր կան նաև, որ մշակութային օբյեկտները վերածվում են տների, առևտրի կենտրոնների, նույնիսկ գիշերային ակումբների: Այս պարագայում խոսքը յուրաքանչյուր երկրի ներքին ազգային օրենսդրության մասին է, և պետք է ելնել դրանից: Ինչ վերաբերում է կրոնական օբյեկտների և պատմական հուշարձանների ոչնչացմանը, ապա պետք է հասկանալ՝ կոնկրետ ինչի՛ մասին է խոսքը: Սակայն դուք շատ լավ գիտեք մեր դիրքորոշումը, որ պետք է հոգածությամբ վերաբերվել կրոնական օբյեկտներին, պատմական հուշարձաններին»,- հայտարարել է Մարիա Զախարովան: