Ճապոնիան հաստատել է կորոնավիրուսի դեմ առաջին պատվաստանյութը. դա Pfizer-ի պատվաստանյութն է

Ճապոնիայի առողջապահության նախարարությունը կիրակի հայտարարել է, որ այն պաշտոնապես հաստատել է կորոնավիրուսի դեմ Pfizer ընկերության պատվաստանյութը, հաղորդում է Reuters-ը:

Դա երկրում հաստատված առաջին պատվաստանյութն է: Ճապոնիան միջոցներ է ձեռնարկում երկրում կորոնավիրուսի երրորդ ալիքը հաղթահարելու ուղղությամբ նախքան Ամառային Օլիմպիական խաղերը:

Ճապոնիայի վարչապետ Յոսիխիդե Սուգան հայտարարել է, որ պատվաստումները կմեկնարկեն հաջորդ շաբաթ, եւ առաջինը կպատվաստվի շուրջ 10 000 բուժաշխատող:

Կառավարությունը հույս ունի ապահովել ամբողջ բնակչությանը պատվաստումներով մինչեւ տարվա կեսերը:

Ճապոնիայի մեծ մասը դեռեւս գտնվում է արտակարգ դրության պայմաններում վիրուսի երրորդ եւ ամենամահացու ալիքից հետո:

Ճապոնիայում գրանցվել է ընդհանուր առմամբ շուրջ 410 000 վարակման դեպք, մահացել է 6772 պացիենտ:

Օլիմպիական խաղերը պետք է սկսվեն հուլիսի 23-ին: