Ինչու՞ հայկական արտադրության անօդաչուները գրեթե չկիրառվեցին Ղարաբաղում

Հայկական արտադրության անօդաչու թռչող սարքերի լայնածավալ օգտագործման բացակայությունը պայմանավորված է զանգվածային արտադրության բացակայությամբ: Այս մասին փետրվարի 9-ին լրագրողների հետ հանդիպմանն ասաց Հայաստանի բարձր տեխնոլոգիական արդյունաբերության նախարար Հակոբ Արշակյանը:

Նա հավելեց, որ գրոհային եւ հետախուզական ԱԹՍ-ների մշակման եւ արտադրության շրջանակներում ֆինանսավորման նախագծեր են ընդունվել, իսկ դրանց մի մասով աշխատանքներն արդեն ավարտվել են: Երկու տեսակի ԱԹՍ-ների համար էլ, ըստ Արշակյանի, Հայաստանը պետք է արտադրական հնարավորությունների հասնի, օրինակ, այժմ ընթանում են գրոհային անօդաչու սարքերի փորձարկումները:

«Սերիական պատվերներ կարելի էր ընդունել միայն հետախուզական ԱԹՍ-ների համար, քանի որ դրանց ուղղությամբ 2020-ի համար նախատեսված բոլոր նախապատրաստական ​​աշխատանքները կատարվել էին: Մնացած ուղղություններով պատվերները կարելի է ընդունել միայն 2021 թվականին: Հետախուզական ԱԹՍ-ները, որոնք իրենց պարամետրերով չեն զիջում մրցակիցներին, օգտագործվել են Ղարաբաղում եւ լավ են իրենց դրսեւորել: Օգտագործվել են նաեւ այն ԱԹՍ-ները, որոնք փորձարկումներ չեն անցել, սակայն պատրաստ են եղել»,- ասաց Հակոբ Արշակյանը:

Պատասխանելով հարցին, թե ինչու հայկական ԱԹՍ-ների աշխատանքի կադրեր գրեթե չեն հրապարակվել, ինչպես դա անում էր հակառակորդը, նախարարը պարզաբանեց, որ քանի որ խոսքը հետախուզական ապարատների մասին է, ապա դրանց տրամադրված տեղեկատվությունը գաղտնի է եւ ենթակա չէ հրապարակման:

Նշենք, որ մինչ Ադրբեջանի կողմից Լեռնային Ղարաբաղի վրա վերջին հարձակումն Արշակյանն անընդհատ պարծենում էր տեղական ԱԹՍ-ներով, որոնց արտադրությունը սկսվել էր «թավշյա հեղափոխությունից» գրեթե 10 տարի առաջ: Սակայն պատերազմի 44 օրվա ընթացքում հայ հասարակությունն այդպես էլ ականատես չեղավ դրանց կիրառմանն ադրբեջանա-թուրքական ագրեսիայի դեմ: