Ջո Բայդենը հայտարարել է կորոնավիրուսի համավարակի պատճառով ԱՄՆ-ում ինքնասպանությունների եւ սովի աճի մասին

ԱՄՆ նախագահ Ջո Բայդենը փրկության ամերիկյան ծրագրի անհրաժեշտության թեմայով ելույթի ժամանակ հայտնել է խնդիրների մասին, որոնց երկիրը բախվել է կորոնավիրուսի համավարակի պատճառով:

«Այսօր հրապարակվել են աշխատանքային զբաղվածության հունվարի տվյալները: Եվ չնայած մենք շնորհակալ ենք բոլորին, ովքեր աշխատանք են գտել եւ աշխատավարձ են ստանում, հրաշալի հասկանում ենք, որ մեր տնտեսությունը դեռեւս աղետի մեջ է: Մենք անցյալ ամիս երկրում ավելացրել ենք ընդամենը 6 հազար աշխատատեղ մասնավոր հատվածում: Ընդհանուր առմամբ, մենք ավելացրել ենք 49 հազար աշխատատեղ: Եվ սա այն դեպքում, երբ մեզ մոտ ավելի քան 10 մլն մարդ գործազուրկ է դարձել, 4 մլն մարդ աշխատանքից զրկվել է կես եւ ավելի տարով, իսկ 2,5 մլն կանայք որպես աշխատուժ բացառվել են: 15 մլն ամերիկացիներ չեն հասցնում վճարել վարձույթի դիմաց: 24 մլն մեծահասակներ եւ 19 մլն երեխաներ տառացիորեն սնունդի պակաս են զգում»,- հայտարարել է ԱՄՆ նախագահը:

Նրա խոսքով՝ աճել է նաեւ ինքնասպանությունների թիվը:

«Ինքնասպանություններն աճում են: Աճում է կանանց եւ երեխաների նկատմամբ բռնությունը: Շատերը հույսը կորցնում են: Եվ ես հավատում եմ, որ ամերիկացի ժողովուրդը հիմա օգնություն է փնտրում իր կառավարության մոտ, որ մենք կատարենք մեր աշխատանքը, որ նրանց հուսախաբ չանենք: Ուստի ես կգործեմ եւ կգործեմ արագ»,- ասել է ԱՄՆ նախագահը:

«Իմ ծրագիրն այն է, որ ավելի շատ աշխատատեղեր ստեղծենք, ինչը ավելի շատ տնտեսական աճ կստեղծի եւ մեզ ավելի մրցունակ կդարձնի մնացյալ աշխարհի համեմատությամբ, քան ցանկացած այլ ծրագիր: Մի հավատացեք իմ խոսքին: Ուղղակի նայեք, թե ինչ են ասել ամբողջ երկրում առաջատար տնտեսագետները. ե՛ւ ամբողջ աշխարհում, ե՛ւ օվկիանոսից այն կողմ:

Ուոլ սթրիթից Moody's ներդրումային ընկերությունն ասում է, որ եթե մենք անցնենք փրկության ամերիկյան ծրագրով, ապա դա կհանգեցնի 4 մլն-ից ավելի աշխատատեղերի ստեղծման, քան կստեղծվեր հակառակ դեպքում: Անկուսակցական Բրուքինգյան ինստիտուտը տեսել է «Ամերիկայի փրկության ծրագիրը» եւ ասել, որ 2021 թվականին ՀՆԱ-ն կհասնի մինչհամաճարակային կանխատեսումներին, իսկ դա նշանակում է, որ մենք 2021 թվականի վերջին կվերականգնվենք: Եվ, ի դեպ, շատ ավելի արագ, քան եթե ոչ մի բան չձեռնարկենք»,- հավելել է ԱՄՆ նախագահը: