ԱՄՆ-ն պաշտպանելու է իր պետական շահերը եւ Պեկինին պատասխանատվության է ենթարկելու միջազգային համակարգը խարխլելու համար...

Այն ժամանակից ի վեր, ինչ Ջո Բայդենը սկսել է կատարել ԱՄՆ նախագահի իր պարտականությունները, ԱՄՆ եւ Չինաստանի բարձրաստիճան ներկայացուցիչների միջեւ առաջին զրույցի ընթացքում ԱՄՆ պետքարտուղար Էնթոնի Բլինքենը Պեկինի վրա ճնշում է գործադրել ույգուրների, տիբեթցիների եւ Հոնկոնգի նկատմամբ պահվածքի պատճառով, փոխանցում է՝ AFP-ն:

«Ես հստակ հասկացրել եմ, որ ԱՄՆ-ն պաշտպանելու է իր պետական շահերը, աջակցելու է ժողովրդավարական արժեքներին եւ Պեկինին պատասխանատվության է ենթարկելու միջազգային համակարգը խարխլելու համար»,- նշել է Բլինքենը Twitter-ի իր միկրոբլոգում՝ Չինաստանի Կոմունիստական կուսակցության արտաքին գործերով Կենտրոնական հանձնաժողովի տնօրեն Յանգ Ցզեչիի հետ զրույցի արդյունքներով:

Բլինքենը Յանգին ասել է, որ ԱՄՆ-ն «կշարունակի աջակցել Ցինցզյանում, Տիբեթում եւ Հոնկոնգում մարդու իրավունքներին ու ժողովրդավարական արժեքներին»:

ԱՄՆ պետքարտուղարը նաեւ Պեկինի վրա ճնշում է գործադրել, որ նա «միջազգային հանրությանը միանա Բիրմայում ռազմական հեղաշրջման դատապարտման հարցում», ասել է նա՝ օգտագործելով Մյանմարի նախկին անվանումը:

Նա հայտարարել է, որ ԱՄՆ-ն Պեկինին «պատասխանատվության կենթարկի ջանքերի պատճառով, որոնք ուղղված են Հնդկա-խաղաղօվկիանոսյան տարածաշրջանում կայունության սպառնալիքին, այդ թվում՝ Թայվանյան նեղուցի միջոցով, ինչպես նաեւ կանոնների վրա հիմնված միջազգային համակարգը խարխլելու պատճառով»:

Բլինքենի խոսքով՝ ինքը համաձայն է Թրամփի օրոք Պետքարտուղարության վճռականության հետ, որ Պեկինը Սինցզյան արեւմտյան նահանգում «ցեղասպանություն» է իրականացնում: