Սահմանադրություն չսիրող, բայց Սահմանադրության տոն ունեցող ժողովուրդը

Սկզբից եկավ Լեւոն Տեր-Պետրոսյանը եւ ժողովրդին համոզում էր, որ կարող ենք ապրել առանց սահմանադրության, այնպես, ինչպես բրիտանացիները եւ իսրայելցիները:

Հետո, հենց նա փոշմանեց, եւ 1995թ. ունեցանք սահմանադրություն: Բնականաբար, ընդդիմությունը հայտարարեց, թե սահմանադրական հանրաքվեի արդյունքները կեղծված են:

Կիսանախագահական կառավարման կարգը ընդդիմադիրները չէին վիճարկում, բայց ասում էին սահմանադրությունը չենք ընդունում, քանի որ այն կեղծված է:

Այն ժամանակվա ընդդիմադիրները Վազգեն Մանուկյանն էր, դաշնակցականները, տարատեսակ մանր եւ կիսամանր կուսակցություններ եւ իհարկե, կոմունիստական կուսակցությունը:

Այնուհետեւ եկավ 2005թ. եւ նախագահ Ռոբերտ Քոչարյանը նախաձեռնեց սահմանադրական հանրաքվե, փոխվեցին շատ հոդվածներ, որից հետո մեր սահմանադրությունը դարձավ շատ ավելի լավը: Իհարկե, ընդդիմությունը հայտարարեց, որ կեղծվել է քվեարկության արդյունքները եւ չընդունեցին արդեն փոփոխված սահմանադրությունը:

2016-ին սահմանադրությունն արմատապես փոխեցին հանրապետականները՝ Սերժ Սարգսյանի գլխավորությամբ: Սերժ Սարգսյանը խոստացավ, որ երբեք չի հավակնի վարչապետի պաշտոնին: Իսկ ինչու վարչապետի, քանի որ այդ փոփոխություններից հետո երկիրը կիսանախագահական կառավարումից վերածվում էր խորհրդարանականի:

Բնականաբար, ընդդիմությունը հայտարարեց, որ հանրաքվեի արդյունքները կեղծված են, իսկ Սերժ Սարգսյանն էլ դարձավ վարչապետ: 

Իսկ թե ինչ եղավ հետո, գիտեն բոլորը:

Ի դեպ, երբ վարչապետ դարձավ Նիկոլ Փաշինյանը, միանգամից նախաձեռնեց սահմանադրական փոփոխություններ, բայց մինչ կիրագործվեն նոր փոփոխությունները, մի քանի անգամ ապտակեց սահմանադրությանը, անելով իր ուզած կամայական փոփոխությունները:

Այսօր Սահմանադրության օրն է: Եւ նրանք ովքեր տարբեր ժամանակներում հայտարարել են, թե չեն ընդունում սահմանադրական հանրաքվեի արդյունքները, տարբեր ձեւերով խախտել են սահմանադրությունը, շնորհավորում են ժողովրդին սահմանադրության օրվա կապակցությամբ:

Աննման ժողովուրդ ենք, աննման քաղաքական էլիտայով:

Top-News.am