Առաջին մարզիկը, որը կորոնավիրուսի պատճառով բաց կթողնի Տոկիո-2020-ը

Թաեքվոնդոյի կանանց Չիլիի հավաքականի անդամ Ֆերնանդա Ագիրեն կորոնավիրուսի պատճառով բաց կթողնի Ճապոնիայի մայրաքաղաք Տոկիոյում կայանալիք 32-րդ ամառային Օլիմպիական խաղերը, hաղորդում է երկրի Օլիմպիական կոմիտեի մամուլի ծառայությունը:

21-ամյա մարզուհին հանձնել է կորոնավիրուսի 2 թեստեր, որոնք դրական են եղել: Հիվանդությունը նրա մոտ անցնում է առանց սիմպտոմների: Ֆերնանդա Ագիրեն առաջին մարզիկն է, որը կորոնավիրուսի պատճառով բաց կթողնի Տոկիո-2020-ը:

Հուլիսի 1-ից մինչև օրս Տոկիո-2020-ում կորոնավիրուսի վարակման 79 դեպք է գրանցվել պատվիրակության անդամների շրջանում: Վարակվածներից հինգը եղել են Օլիմպիական ավանում:

Հիշեցնենք, որ կորոնավիրուսի վարակման տեմպի աճի հետեւանքով Տոկիոյում հուլիսի 12-ից օգոստոսի 8-ը արտակարգ դրության ռեժիմ է։ Կորոնավիրուսի պանդեմիայի պատճառով Տոկիո-2020 Օլիմպիական խաղերը հետաձգվել էին մեկ տարով և կանցկացվեն 2021թ. հուլիսի 23-ից օգոստոսի 8-ը: