Անդրեյ Շևչենկո. Շատ էի ցանկանում հասնել այս արդյունքին

Ուկրաինայի հավաքականի գլխավոր մարզիչ Անդրեյ Շևչենկոն մեկնաբանել է Եվրո-2020-ի 1/8 եզրափակիչում Շվեդիայի հավաքականի նկատմամբ հաղթանակը 2:1 հաշվով:

«2 թիմերն էլ շատ լավ էին խաղում, հետաքրքիր ֆուտբոլ էր: Ոչ ոք չէր ցանկանում պարտվել, այդ պատճառով ստացվեց այդպիսի դրամա: Մենք գիտենք, որ մեզ երկրպագում են: Թիմն իր խաղով ու նվիրվածությամբ արժանացել է Ուկրաինայի սիրուն: Մեր ընտրած ծրագիրն աշխատեց: Փորձում էինք կառավերել խաղը: Ոչ միշտ էր ստացվում, սակայն թիմն ամբողջությամբ կատարեց իր առջև դրված խնդիրը:

Շնորհակալ ենք բոլորին, ովքեր եկել էին աջակցելու մեզ: Այստեղ էր ընտանիքս, երեխաներս: Շատ էի ցանկանում հասնել այս արդյունքին: Շնորհակալ եմ թիմին այն ջանքերի ու հերոսության համար, որոնք նրանք ցուցադրեցին:

Հաջորդ խաղում դրական արդյունքի հասնելու համար անհրաժեշտ է հավատ ու դիմացկունություն: Անգլիայի հավաքականն ուժեղ թիմ է՝ բարձրակարգ կատարողներով ու երկար պահեստայինների նստարանով: Հասկանում ենք, թե որքան բարդ հանդիպում է սպասում մեզ: Հիմա ամենագլխավորն ուժերը վերականգնելն է, որպեսզի կարողանանք արժանի դիմադրություն ցույց տալ անգլիացիներին»,- ուկրաինացի լեգենդար ֆուտբոլիստի խոսքը մեջբերում է ՈւԵՖԱ-ի մամուլի ծառայությունը:

Հիշեցնենք, որ Ուկրաինայի հավաքականը հաղթել էր լրացուցիչ ժամանակում և պատմության մեջ առաջին անգամ դուրս եկել Եվրոպայի առաջնության քառորդ եզրափակիչ, որտեղ հուլիսի 3-ին Հռոմում կմրցի անգլիացիների հետ: