«Լոս Անջելես Գելաքսին» բանակցում է «Ռեալի» հետ Գարեթ Բեյլի տրանսֆերի հարցով

«Լոս Անջելես Գելաքսին» ցանկանում է ձեռք բերել Մադրիդի «Ռեալի» եւ Ոելսի հավաքականի հարձակվող Գարեթ Բեյլին, հաղորդում է Goal.com-ը։ Ամերիկյան ակումբն այդ հարցով սկսել է բանակցությունները «Ռեալի» հետ։

Արքայական ակումբի նորանշանակ իտալացի գլխավոր մարզիչ Կառլո Անչելոտին հայտարարել էր, որ Բեյլը դեռ կարող է իրեն դրսեւորել Իսպանիայում, սակայն «Ռեալի» նախագահ Ֆլորենտինո Պերեսը ցանկանում է ազատվել 31-ամյա ֆուտբոլիստից, որը թիմի ամենաբարձր վարձատրությամբ խաղացողներից է՝ տարեկան 15 միլիոն եվրո աշխատավարձ։

Բեյլը 2013 թվականին է Լոնդոնի «Տոտենհեմից» 101 միլիոն եվրոյի դիմաց տեղափոխվել «Ռեալ»։ Անցած մրցաշրջանը նա վարձակալությամբ անցկացրեց «Տոտենհեմում»՝ Անգլիայի առաջնության 20 խաղում խփելով 11 գոլ, կատարելով 2 գոլային փոխանցում։ Եվրոպայի լիգայում Բեյլը մասնակցեց 10 հանդիպման, խփեց 3 գոլ, կատարեց 1 գոլային փոխանցում։