Շվեյցարիայի ԱՆ–ը արգելել է ՈւԵՖԱ–ին եւ ՖԻՖԱ–ին պատժամիջոցներ կիրառել Սուպերլիգան չլքած ակումբների դեմ

Շվեյցարիայի Արդարադատության նախարարությունը Ֆուտբոլի միջազգային ֆեդերացիային (ՖԻՖԱ) եւ Ֆուտբոլային ասոցիացիաների եվրոպական միությանը (ՈւԵՖԱ) պաշտոնապես ծանուցել է, որ այդ կազմակերպություններն իրավունք չունեն պատժամիջոցներ կիրառել Եվրոպական Սուպերլիգայից դուրս չեկած ակումբների դեմ, հաղորդում է իսպանական Cadena SER–ը։

ՖԻՖԱ–ն ու ՈւԵՖԱ–ն տեղակայված եւ գրանցված են Շվեյցարիայում։ Սուպերլիգայի նախագծից դուրս չեն եկել Մադրիդի «Ռեալը», կատալոնական «Բարսելոնան» եւ Թուրինի «Յուվենտուսը»։ Երեք ակումբները Եվրոպական դատարանում վիճարկում են ՈւԵՖԱ–ի կարգապահական որոշումները՝ կազմակերպությանը մեղադրելով մրցակցության սկզբունքերի խախտման եւ իրավազանցության մեջ։

Սուպերլիգայի 12 հիմնադիր ակումբներից 9–ը ազգային ֆեդերացիաների, ակումբների երկրպագուների եւ ՖԻՖԱ–ի ու ՈւԵՖԱ–ի ճնշման տակ հրաժարվեցին նախագծից։

ՈւԵՖԱ–ն 9 ակումբներին պատժել է 15 միլիոն եվրո բարեգործական վճարով եւ եվրագավաթային մրցաշարերի պարգեւավճարից 5 տոկոսի վերադարձով։