Եթե ճարտարապետը երկու տարին մեկ փոխվում է, ի՞նչ գիտելիքներով է գալիս․ Գուրգեն Մուշեղյան

ՀՀ վաստակավոր ճարտարապետ Գուրգեն Մուշեղյանը կարծում է՝ Երեւանը պետք է ունենա գլխավոր ճարտարապետ, բայց նա պետք է լինի իրազեկ եւ տեղեկացված մեկը։

«Սովետական միության գոյության ամբողջ ընթացքում ունեցել ենք ընդամենը 7 գլխավոր ճարտարապետ, իսկ դրանից հետո 30 տարիներին ունեցել ենք 20-25 գլխավոր ճարտարապետ։ Եթե այդ ճարտարապետը ամիսը կամ երկու տարին մեկ փոխվում է, ի՞նչ գիտելիքներով է գալիս լինելու գլխավոր ճարտարապետ։ Օրինակ՝ առաջին գլխավոր ճարտարապետին փոխարինել է նրա տեղակալը, նրան էլ հետո իր տեղակալը, որովհետեւ աշխատել են, տիրապետել են քաղաքին։ Պետք է տիրապետել, բայց հիմա նույնիսկ ինստիտուտներ չկան, որ այդ ինստիտուտներում մասնագետներ ձեւավորվեն»,- NEWS.am-ի հետ զրույցում նշեց նա։

Քաղաքապետ Հայկ Մարությանը հայտարարել է, որ ինքը կարծում է, թե մայրաքաղաքին գլխավոր ճարտարապետ անհրաժեշտ չէ։ Գուրգեն Մուշեղյանի կարծիքով՝ փորձում են կապիտալիստական երկրների օրինակով շարժվել, որտեղ գլխավոր ճարտարապետի փոխարեն որոշումները կայացնում են հանձնաժողովները։ Երեւանի պարագայում, սակայն, նախնական լուրջ աշխատանք է անհրաժեշտ տանել։

«Կապիտալիստական երկրներում գլխավոր ճարտարապետ գոյություն չունի, բայց գոյություն ունի կարգ ու կանոն քաղաքաշինական խնդիրները լուծելու համար։ Այսինքն՝ արվում է գլխավոր հատակագիծ, դրա հիման վրա արվում է գոտեւորման նախագիծ, դրա հիման վրա արվում է մանրամասն հատակագծման նախագիծ, որտեղ քաղաքի յուրաքանչյուր հատվածն առանձնացվում է՝ որն ինչ նպատակի համար պետք է ծառայի եւ ինչ է այնտեղ թույլատրվում անել, ոչ թե մարդկանց ցանկությամբ, որ ես ուզում եմ այստեղ տուն կառուցել, այս կառուցել, այն կառուցել։ Երեւանի գլխավոր հատակագիծը, որ հաստատվել է 2005թ․, որով պետք է ղեկավարվեին, հսկայական փոփոխությունների է ենթարկվել, հիմա արդեն հիմքեր չունեն։ Այնպիսի բաներ են կառուցվել, որ այդ տեղում, ենթադրենք, դա նախատեսված չեն եղել։ Դրա համար պետք է ունենալ հաստատված փաստաթուղթ»,- ասաց նա՝ նշելով, որ նման պարագայում միայն կարող է գլխավոր ճարտարապետը դերակատարություն չունենալ։

Գուրգեն Մուշեղյանի խոսքով՝ եթե այլ երկրների օրինակն են փորձելու կիրառել Երեւանում, ապա նախ պետք է ուսումնասիրեն, թե ինչպես է կարգավորվում ոլորտն այդ պարագայում։

«Օրինակ, եթե դրսում քաղաքացին դիմում է՝ ֆունկցիոնալ փոփոխություն կատարելու տան հետ, հատուկ հանձնաժողով կա։ Նա գալիս է մասնագետներով, իրազեկում են հարեւաններին՝ արդյոք նրանք համաձայն են, թե ոչ, քննարկում են, ապա տալիս են համաձայնությունը»,- ասաց նա։