Կառավարությունը պետք է վերանայի ֆինանսավարկային քաղաքականությունը և դա իրականացնող կադրերին, որոնք ձախողել են այն

Մինչև պարտք վերցնելը պետք է կառավարությունը սահմանի ծախսերի ուղղությունները, քանի որ պետական պարտքը մեծացնելով` մենք հաջորդ սերունդներին փոխանցում ենք ավելի մեծ ֆինանսական բեռ, և դրա հետևանքով ավելանալու են հաջորդ տարիների ընթացքում պարտքի սպասարկման գումարները: Այս մասին Tert.am-ի հետ զրույցում ասաց ՀՅԴ Բյուրոյի տնտեսական հետազոտությունների գրասենյակի պատասխանատու, տնտեսագետ Սուրեն Պարսյանը՝ անդրադառնալով պետական պարտքի աճին, որը հուլիսի դրությամբ կազմել է 7 մլրդ 939.5 հազար դոլար:

«2009 թվականի ֆինանսատնտեսական ճգնաժամից հետո կառավարության ֆինանսիստները, որոնք առ այսօր կառավարությունում նստած են, մի մոդել իրենց համար մշակեցին, որ՝ եկեք պարտք վերցնենք կապիտալ ծախսեր իրականացնելու համար, այլ կերպ ասած՝ ընթացիկ պետական ծախսերը հոգալու համար, և նրանք ֆինանսատնտեսական ճգնաժամի հետևանքների վերացման հիմնական աղբյուր դիտեցին միայն պարտքը, և այդ գործելաոճը շարունակվում է առ այսօր»,-ասաց նա:

Սուրեն Պարսյանը նշեց, որ 2020 թվականին պետական բյուջեն չի կարողացել հավաքագրել մոտ 170 միլիոն դրամ գումար, հաջորդ ամիսներին թերհավաքագրումը շարունակվելու է, և կառավարությունն ընտրեց նույն տարբերակը՝ ավելացնել պետական պարտքը: «Խնդիրը «պարտք» երևույթի մեջ չէ, այլ դա ճիշտ, արդյունավետ օգտագործելու և, ամենակարևորը, պետության կողմից կատարված ծախսերի արդյունավետության և ուղղությունների մեջ է»,-ասաց նա և նշեց, որ կան շատ անարդյունավետ ծախսեր, որոնք պարտք վերցնելով սպասարկում ենք:

«Այստեղ կառավարությունը պետք է վերանայի իր ֆինանսավարկային քաղաքականությունը և այդ քաղաքականությունը իրականացնող կադրերին, որոնք տարիներ շարունակ ձախողել են այդ քաղաքականությունը, և որոնք առ այսօր պատասխանատվություն չեն կրել դրա համար: Նրանք շարունակում են կառավարությունում մնալ և շարունակում են նույն գործելաոճը»,-ասաց նա և օրինակ բերեց, որ երբ ձախողեցին Հյուսիս-հարավի վարկային փաթեթը և մեծ վարկերի տակ գցեցին Հայաստանին, դրա համար առ այսօր ոչ մեկը պատասխանատվություն չի կրել:

Ամեն դեպքում, տնտեսագետը նկատեց, որ կոռուպցիոն ռիսկերի ակնհայտ նվազում ունենք վերջին տարիների ընթացքում, բայց դրանով չենք լուծում մեր հիմնական խնդիրը, որ պետական բյուջեով նախատեսված ծրագրերը չեն կատարվում: «Այս իշխանությունները ձախողել են վերջին երեք տարիների ընթացքում պետական բյուջեով հաստատված կապիտալ շինարարական գրեթե բոլոր ծրագրերը, օրինակ՝ դպրոցաշինությունը, ջրամբարաշինությունը և այլն: Զուտ ճանապարհաշինությամբ դու չես կարող երկիրը հանել ֆինանսատնտեսական ճգնաժամից: Առհասարակ ֆինանսատնտեսական ճգնաժամի ժամանակ պետությունը ծախսեր է կատարում տնտեսությունը աշխուժացնելու կամ զարգացնելու համար»,-ասաց նա և նշեց, որ ճանապարհաշինությամբ չեն կարողանալու փրկել տնտեսությունը և լուծել ազգաբնակչության սոցիալական խնդիրները, որոնք ավելի է խորանում:

«Ակնհայտ է, որ գործող իշխանությունները հող են նախապատրաստում, որ օգոստոս ամսվա վիճակագրական տվյալներն ավելի լավ ներկայացնեն, որը թույլ կտա ասել, թե՝ տեսեք, մենք արդեն ֆինանսատնտեսական ճգնաժամի պիկը հաղթահարել ենք և արդեն գնում ենք այդ ճգնաժամի վերացման ուղղությամբ, բայց իրականությունը բոլորովին այլ է, քանի որ ճգնաժամը ոչ միայն տնտեսական ակտիվության կամ ՀՆԱ-ի աճի ցուցանիշներով է պայմանավորված, այլ մարդկանց գնողունակությամբ, որը կտրուկ նվազել է, ավելի շատ, քան 2009 թվականին, 1994-1996 թվականներին, սրա մասին պետք է մտածի կառավարությունը»,-ամփոփեց նա: