Ափսոսում եմ, որ անլրջացվում ու նման ցածր մակարդակի է իջեցվում իրավապահ համակարգի գործունեությունը. Վանեցյան

Վերջին իրադարձությունները նայելով ու վերլուծելով՝ ես ուղղակի ափսոսում եմ, որ նման ցածր մակարդակի է իջեցվում ողջ իրավապահ համակարգի գործունեությունը և անլրջացվում է: Այս մասին թերթերի խմբագիրների հետ հանդիպմանն ասել է ԱԱԾ նախկին տնօրեն Արթուր Վանեցյանը:

«Մարդիկ արդեն ծիծաղում են: Մարդը բերման է ենթարկվում, դուրս է գալիս ծաղրում է և անթույլատրելի հայտարարություններ է անում, բայց ինչի՞ է նման իրավիճակ ստեղծվել: Եթե նպատակը մարդկանց վախեցնելն ու լռեցնելն է, ես գործող իշխանություններին ավելի լավ առաջարկ ունեմ. Խորհրդային միության տարիներին ասում էին՝ «15 սուտկա տվեցին», ով իրեն «խելոք չէր պահում», տանում էին նստացնում էին: Թող մի օրենք ընդունեն, ով իրենց դեմ է խոսում, ով իրեն «խելոք չի պահում» դաստիարակչական նկատառումներից ելնելով՝ տանեն «15 սուտկա» նստացնեն: Սա ինչ է նշականում… մարդն ամբողջ օրը ոստիկանության դիմաց կանգնում է, գնում հասնում է տուն, թևերն ոլորում, պառկացնում են գետնին, որպես վերջին ահաբեկչի տանում են ոստիկանություն, հետո բաց են թողնում: Դա նորմա՞լ է: Իհարկե նորմալ չէ»,- ասաց Վանեցյանը:

Վանեցյանը հիշեց, որ այս գործողություններից հետո էլ «Հայկական ժամանակ»-ի խմբագրականում գրել էին, թե ոստիկանությունը սաբոտաժ է անում: «Դուք հավատո՞ւմ եք, որ ոստիկանությունում ինքնուրույն որոշում են, որ կարող են գնալ հանրային, հասարակական, քաղաքական գործիչներին բերման ենթարկել: Իհարկե՝ ոչ»,-հավելեց նա:

«Հրապարակ» օրաթերթի խմբագրի հարցին՝ արդյոք պաշտոնավարման ընթացքում վարչապետի կողմից տրվե՞լ են տարօրինակ, հակաօրինական հանձնարարություններ, Վանեցյանը պատասխանեց, որ 20 տարվա օպերատիվ աշխատողի ստաժ ունեցող մարդը, սպան, գեներալը, երբեք չի պատմի իր վարչապետի հետ իր անձնական և աշխատանքային զրույցների մասին:

Փոխարենը ԱԱԾ տնօրենն անդրադարձավ վարչապետի կողմից ԱԱԾ-ին հրապարակային տրված մի քանի տարօրինակ հանձնարարություններին:

«Վարչապետը բազմիցս տվել է այնպիսի հանձնարարություններ, որոնք ուղղակի կատարման ենթակա չեն: Օրինակ՝ սատանայի հետ որոշ շրջանակների կապը բացահայատելը, ստուգել գազալցակայանները ՀԴՄ կտրոնները տալիս են, թե ոչ, տեղորոշել սևազգեստ անձանց, որոնք զինված շրջում են քաղաքում: Վերջին զարգացումները ցույց տվեցին, որ չկան զինված մարդիկ, կան հորինված կերպարներ, որոնք իբր ահաբեկում են ժողովրդին, իբր հասարակությանը վտանգ են ներկայացնում»,-նշեց նա:

«Առավոտ» օրաթերթի խմբագրի հարցին՝ օրինակ գազալցակայանների մասին վարչապետի հրահանգից հետո ի՞նչ եք ասել, «есть»?, Վանեցյանն արձագանքեց. «Ես եթե ասեի՝ «есть», մինչ օրս կմնայի ԱԱԾ տնօրեն, կլինեի բոլոր կողմից շատ սիրված Վանեցյանը, կլինեի Facebook-ի սիրված հերոսը և չէի գնա այս դժվար ճանապարհով, որն ընտրել եմ: Իմ ողջ ծառայության ընթացքում ես որևէ անօրինական հրաման չեմ կատարել»:

Այս թեմայով Իմ հրաժարականի տեքստը պետք է բոլորի համար ահազանգ լիներ.Արթուր Վանեցյան Համարենք, որ դա «Կանգ առ»-ի կարևոր կետերից մեկն էր. Արթուր Վանեցյան Քանի դեռ այս իշխանությունն է, առաջարկում եմ՝ քիչ խոսել Արցախի, Ապրիլյան պատերազմի, բանակի, անվտանգության համակարգի եւ որոշ այլ թեմաների մասին. Ա. Վանեցյան Արգիշտի Քյարամյանին ԱԱԾ տնօրեն նշանակելն է հենց ազգային անվտանգության սպառնալիք․ Արթուր Վանեցյան Իմ հրաժարականի պատճառներից է եղել Հրայր Թովմասյանի հարցը. Վանեցյան