Ովքեր արժանի են փռվելու, փռվելու են․ Ոստիկանապետի ԺՊ

ՀՀ ոստիկանապետի ժամանակվոր պաշտոնակատար Արման Սարգսյանն այսօր լրագրողների հետ զրույցում անդրադարձավ վարչապետի ասած «ասֆալտին» փռելու թեմային, թե արդյոք շարունակվո՞ւմ են այդ «օպերացիաները»։

«Այո, իրականացվում է և իրականացվելու է, և էդ ասֆալտին փռելը եկեք ընկալենք որպես խոսք, և խոստանում եմ, որ եթե նման անձինք ի հայտ գան, ովքեր արժանի են փռվելու, փռվելու են։ Դա ես խոստանում եմ»,-ասաց Արման Սարգսյանը։

Ինչ վերաբերում է սևազգեստներին հայտնաբերելու և «ծաղկավոր բաբոչկա» հագցնելու մասին վարչապետի հերթական հայտարարությանը, Արման Սարգսյանը նորից նույնը կրկնեց։

«Ես ձեզ խոստանում եմ, որ ոտնձգություններ կատարող յուրաքանչյուր ոք, եթե ոստիկանության ծառայողների աշխատանքի ընթացքում ի հայտ գա, և մենք ունենանք դրա անհրաժեշտությունը, մենք օրենքի սահմաններում ամեն ինչ անելու ենք, այդ թվում՝ օրենքի սահմաններում ֆիզիկական ուժի կիրառում, ինչը ես չեմ թաքցնում, կտեսնեք»,-ասաց պարոն Սարգսյանը։