Ադրբեջանում գների աճի տեմպերը գերազանցել են եվրոպական տեմպերը 10,8 անգամ

Ադրբեջանում տարեկան միջին գնաճը 2016 թվականին գերազանցել է եվրոպական գնաճը 10,8 անգամ։ Եթե Ադրբեջանում, պետական վիճակագրական ծառայության տվյալներով՝ գնաճը կազմել է 12,4 տոկոս, ապա Եվրագոտում՝ ընդամենը 1,14 տոկոս, գրում է contact.az-ը։

Մթերքի ոլորտում գնաճը եղել է 13,3 անգամ ավելի շատ։ Ծառայության տվյալներով՝ Ադրբեջանում մթերային ապրանքները թանկացել են 14,7 տոկոսով, իսկ եվրոպական վիճակագրությունը խոսում է Եվրոպայում մեկտոկոսանոց գնաճի մասին։

Turan գործակալության հաշվարկներով՝ 2016 թվականին, ընդհանուր առմամբ, սպառողական զամբյուղի գների աճը հիմնական մթերային ապրանքների 30 տեսակների համար կազմել է 18 տոկոս, իսկ առավել կարևոր մթերքների համար գները բարձրացել են 22 տոկոսից 100 տոկոսով։ Նշվում է, որ 94,4 տոկոսի գնաճ են գրանցել լոլիկները, իսկ 100 տոկոսի գնաճ՝ վարունգը։

Ինչպես գրում է կայքը, գնաճի նման տեմպեր Եվրոպայի ժամանակակից պատմությունը չի գրանցել ԽՍՀՄ փլուզումից հետո։

Եվրամիությունում գնաճի մակարդակը վերջին 20 տարիներին տատանվել է տարեկան 2 տոկոսի մոտակայքում։ Ամենամեծ գնաճը գրանցվել է 2007 թվականին՝ 3,2 տոկոս։

tert.am