Ռեկորդային տուգանք՝ որսագողության համար
Մալայզիայի հյուսիսում գտնվող Կուալա Թրենգանու քաղաքի դատարանը վիետնամցի երկու որսագողի տուգանել է ռեկորդային՝ 375 հազար դոլար տուգանքով, տեղեկացնում է ՏԱՍՍ-ը՝ հղում կատարելով The Star-ին։
Մեղադրվող վիետնամցիները ձերբակալվել են 2019-ի ապրիլին։ Նրանց մոտ հայտնաբերվել են ընձառյուծի, մալայական արջերի եւ այլ կենդանիների մի քանի տասնյակ մորթիներ։ Նրանք նաեւ պահել էին սպանված երկու մալայական վագրերի մարմինների թանկարժեք մասերը, որոնք վայրի բնության մեջ ընդամենը 200 առանձնյակի չափով են մնացել։
Դատարանի որոշման համաձայն՝ բացի տուգանքից՝ որսագողերը դատապարտվել են երկու տարվա բանտարկության։ Եթե պահանջվող գումարը չվճարեն, նրանք կազատազրկվեն 16 տարով։
«Այս դատավճիռը մեզ ոգեւորում է այսուհետ եւս հետապնդել որսագողերին օրենքի ողջ խստությամբ»,- ասել է Մալայզիայի արգելոցների եւ ազգային պարկերի վարչության ղեկավար Դաթուկ Հաշիմը։ Նա նշել է, որ երկրի իշխանությունները կշարունակեն հակազդել կենդանիների ապօրինի որսին։