BBC-ն աշխատանքից հեռացրել է հեռուստահաղորդավարին՝ Հարիի և Մեգան Մարքլի որդուն վիրավորելու համար
BBC ընկերությունն աշխատանքից հեռացրել է հեռուստահաղորդավար Դենի Բեյքերին թվիթերյան լուսանկարի համար, որում Մեծ Բրիտանիայի արքայազն Հարիի և Մեգան Մարքլի առաջնեկը պատկերված է եղել շիմպանզեի տեսքով, հաղորդում է РЕН ТВ-ն:
«Ինձ հենց նոր հեռացրին BBC Radio 5 Live-ից»,- հայտնել է Բեյքերը սոցցանցում:
Մեծ Բրիտանիայում լայն արձագանք էր գտել մարդու հագուստով շիմպանզեի ձեռքից բռնած զույգի սև-սպիտակ լուսանկարը, որը վերնագրված էր. «Թագավորական նորածինը լքում է հիվանդանոցը»: Սկանդալից հետո Բեյքերը ներողություն էր խնդրել և հեռացրել լուսանկարը:
BBC-ն առայժմ պաշտոնապես չի հաստատել հեռուստահաղորդավարին հեռացնելու մասին լուրը:
Հիշեցնենք, որ արքայազն Հարիի և Մեգան Մարքլի որդին լույս աշխարհ էր եկել մայիսի 6-ին: Նրան անվանակոչել են Արչի Հարիսոն Մաունթբաթեն-Վինդսոր: