Թուրքիայում ռուս զբոսաշրջիկներին կոչ են արել Ռամադանի ընթացքում նրբանկատ լինել պահք պահող մահմեդականների նկատմամբ
Թուրքիայի կրոնական իշխանությունները դիմել են երկրում հանգստացող ռուս զբոսաշրջիկներին՝ կոչ անելով մահմեդականների համար սրբազան համարվող Ռամադան ամսվա ընթացքում նրբանկատություն ցուցաբերել տեղի բնակիչների նկատմամբ՝ հնարավորության սահմանում խուսափելով նրանց ներկայությամբ սննդի ընդունումից:
Այս մասին գրում է ria.ru-ն՝ մանրամասնելով, որ Ռամադանը սկսվել է մայիսի 5-ի երեկոյան և կտևի մինչև հունիսի 3-ը: Այս ընթացքում բարեպաշտ մահմեդականները ցերեկային ժամերին չպետք է սնվեն, խմեն, ծխեն կամ սեռական հարաբերություններ ունենան:
Թուրքիայի կրոնի հարցերով պետական վարչության մամուլի քարտուղար Մուստաֆա Ջերահը ria.ru-ի հետ զրույցում նշել է, որ թեև ռուս զբոսաշրջիկները Ռամադանի ընթացքում միանգամայն ազատ կլինեն դրսում սնվելու և խմելու հարցերում, սակայն ցանկալի է, որ նրանք հարգանքով վերաբերվեն պահք պահողներին և հնարավորության դեպքում նրանց ներկայությամբ չսնվեն, չխմեն, որպեսզի հավատացյալներին չգայթակղեն և չստիպեն տանջվել: