ԱՄՆ-ը կոչ է արել Թուրքիային դադարեցնել հորատումը Կիպրոսի ափերին
ԱՄՆ Պետդեպարտամենտը Թուրքիային կոչ է արել դադարեցնել հորատումները Կիպրոսի բացառիկ տնտեսական գոտում, քանի որ դա հղի է տարածաշրջանում լարվածության աճով, տեղեկացնում է ՌԻԱ «Նովոստի»-ն։
«Միացյալ Նահանգները խորապես մտահոգ է Թուրքիայի հայտարարած մտադրությունների առիթով՝ ծովային հորատումներ սկսել մի շրջանում, որը Կիպրոսի Հանրապետությունը հայտարարել է իր բացառիկ տնտեսական գոտին։ Այդ քայլը բավական սադրիչ բնույթ ունի եւ հղի է տարածաշրջանում լարվածության աճով։ Մենք համառորեն կոչ ենք անում թուրքական իշխանություններին դադարեցնել այդ գործողություններն ու հորդորում ենք բոլոր կողմերին զսպվածություն ցուցաբերել»,- ասվում է գերատեսչության հայտարարությունում։
Նավթադաշտում եւ Կիպրոսի բացառիկ տնտեսական գոտում հայտնաբերվել են գազի հանքավայրեր։ Թուրքիան կարծում է, որ իրավունք ունի տարածաշրջանում այդ բնական հարստության հանդեպ։ Անկարան շրջան է ուղարկել «Ֆաթիհ» հորատող նավը, որը շաբաթ օրվա առավոտվանից գտնվում է Կիպրոսի բացառիկ տնտեսական գոտում։