Վլադիմիր Զելենսկու հանդիսավոր երդմնակալությունը կարող է տեղի ունենալ մայիսի 19-ին
Ուկրաինայի Գերագույն ռադայի ոչ խմբակցային պատգամավոր Սերգեյ Միշչենկոն ուրբաթ գրանցել է երկրի նոր նախագահ Վլադիմիր Զելենսկու երդմնակալության արարողության ամսաթվի մասին բանաձևի փաթեթը: Ինչպես հայտնում է ТАСС գործակալությունը` հղում անելով երկրի խորհրդարանի կայքին, երդմնակալության ամսաթիվն, ըստ բանաձևի, կարող է լինել մայիսի 19-ը:
Ուկրաինայի Կենտրոնական ընտրական հանձնաժողովը ապրիլի 30-ին պաշտոնապես հնչեցրել էր նախագահական ընտրությունների պաշտոնական արդյունքները: Ընտրությունների երկրորդ փուլում հաղթանակ է տարել Վլադիմիր Զելենսկին`ստանալով ընտրողների ձայների 73.22 տոկոսը, մինչդեռ գործող նախագահ Պյոտր Պորոշենկոն ստացել էր ձայների 24.45 տոկոսը:
Ուկրաինայի նախագահի երդմնակալության ամսաթիվը որոշում է Գերագույն ռադան, որի առաջիկա լիագումար նիստը կկայանա մայիսի 14-ին: Եթե խորհրդարանում անհրաժեշտ քանակով պատգամավորներ ներկա չլինեն (առնվազն 226), ամսաթիվը կորոշի Ռադայի խոսնակը: