Օլիմպիական կրկնակի չեմպիոնուհուն ստիպել են իջեցնել տեստոստերոնի մակարդակը

Հարավաֆրիկյան վազորդուհի Քասթեր Սեմենյան ստիպված է իջեցնել տեստոստերոնի մակարդակը, որպեսզի մասնակցի Կատարում կայանալիք աշխարհի առաջնությանը։ Այս մասին հայտնում է Associated Press-ը։

Սպորտային արբիտրաժային դատարանը մերժել է սպորտսմենուհու հայցը։ Նա փորձել է բողոքարկել Թեթևաթլետիկական ֆեդերացիաների միջազգային ասոցիացիայի(IAAF) կանոնը։ Դատարանը IAAF-ի տվյալ միջոցը խտրական է համարել, բայց ուժի մեջ թողել այն։

2019-ի փետրվարին IAAF-ն առաջարկել է սեռական զարգացման առանձնահատկություններով աթլետներին դեղամիջոցներով իջեցնել տեստոստերոնի մակարդակը՝ մրցումներին մասնակցելու համար։ Սեմենյան չի համաձայնել և դիմել է դատարան։

Սպորտսմենուհին Օլիմպիական խաղերում 800 մետր վազքում երկու անգամ ոսկե մեդալ է նվաճել։ Տղամարդուն բնորոշ կազմվածքի և ցածր տեմբրի պատճառով նա ստիպված է եղել թեստ անցնել՝ ապացուցելու համար, որ կենսաբանորեն կին է համարվում։