Թուրքմենստանի նախագահը ձիու մասին ռեփ է կատարել (տեսանյութ)
Թուրքմենստանի նախագահ Գուրբանգուլի Բերդիմուհամեդովը ռեփ է կատարել Ռովաչ մականունով ձիու քուռակի համար, որը ծնվել է 2019 թվականի առաջին օրը: Այս մասին հայտնում է «РИА Новости»-ն:
Նշվում է, որ ռեփի բառերի հեղինակը հանրապետության ղեկավարն է, իսկ երաժշտությունը գրել է նրա թոռը, ով էլ ձայնակցել է նախագահին: Գուրբանգուլի Բերդիմուհամեդովն իր երգը ներկայացրել է հեծանվային միջազգային սպորտային համալիրում` Թուրքմենստանի ձիերի ազգային տոնի պատվին:
Երգում ասվում է, որ Ռովաչ քուռակը երկրում բարեկեցության հովանավորն է և ոգեշնչման աղբյուր է հանդիսանում: 2019 թվականի սկզբին ձիուն Բերդիմուհամեդովին էր նվիրել Թուրքմենստանի ՆԳ նախարար Իսգենդեր Մուլիկովը` ՆԳՆ կազմի անունից: Ի դեպ, սա Թուրքմենստանի նախագահի առաջին կատարումը չէ: 2018 թվականին նա թոռան հետ կրկին ռեփ էր կարդացել: