Հնդկաստանում 20 ուսանող ինքնասպան է եղել քննությունների բացասական արդյունքների հետեւանքով
Այս շաբաթվա ընթացքում Հնդկաստանում 20 ուսանող ինքնասպան է եղել Միջազգային կրթության հանձնաժողովի կողմից քննությունների արդյունքները հրապարակելու հետեւանքով, հաղորդում է Fox News-ը:
Նշվում է, որ փետրվարից մարտ ընկած ժամանակահատվածում քննություններ է հանձնել շուրջ մեկ միլիոն ուսանող, որոնցից 350 000-ը ստացել է անբավարար գնահատական, ինչը բողոքի ալիք է բարձրացրել ծնողների, ուսանողների եւ անգամ քաղաքական կուսակցությունների շրջանում:
Այնուհետեւ սկսվել է ինքնասպանությունների ալիքը: Օրինակ՝ Սիրիշա անունով ուսանողուհին, տեղեկանալով կենսաբանության անբավարար գնահատականի մասին, վերադարձել է տուն Նարայանփետ քաղաքում եւ ինքնահրկիզվել, երբ ծնողները տանը չէին:
Ավելի ուշ կրթության նախարար Չանդրաշեհար Ռաոն հանձնարարել է վերահաշվել բոլոր ուսանողների քննությունների արդյունքները, ներառյալ նրանց, ովքեր ստացել են անբավարար գնահատականներ, եւ կոչ արել ուսանողներին ինքնասպանություն չգործել՝ հավաստիացնելով, որ քննությունն անհաջող հանձնելը դեռ կյանքի վերջը չէ:
Երիտասարդների ծնողները գտնում են, որ ողբերգության պատասխանատուն Globarena Technologies Private Limited ծրագրային ապահովման ընկերությունն է, որը զբաղվում էր քննությունների արդյունքները ստուգելու համար ծրագրային ապահովման մշակմամբ: