Թուրքմենբաշին նոր գիրք է գրել ձիերի մասին
Թուրքմենստանի մայրաքաղաքում տեղի է ունեցել երկրի նախագահ Ղուրբանղուլի Բերդիմուհամեդովի՝ ձիերին նվիրված նոր գրքի շնորհանդեսը։ Նախագահը, որ հայտնի է տարբեր դերերում իրեն փորձելով, այս անգամ իր գիրքը լույս է ընծայել թուրքմենական նժույգին նվիրված ազգային տոնի օրը։
«Նժույգը՝ հավատարմության ու երջանկության խորհրդանիշ» անունով գիրքը պատմում է թուրքմենական ազգի պատմության ընթացքում ձիու դերի ու առհասարակ մարդկային քաղաքակրթության զարգացման ճանապարհին նժույգի ունեցած ներդրման մասին։ Բերդիմուհամեդովի նախորդ գիրքը նույնպես նվիրված էր ձիերին․ դրա վերնագիրն էր «Նժույգն ունի և՛ հավատարմություն, և՛ ուրախություն»։
Ինչ վերաբերում է գրքի հեղինակին, ապա նա հայտնի է իր էքսցենտրիկ արարքներով․ նրան նվիրված ռեպորտաժների համաձայն՝ Բերդիմուհամեդովը երկրի ուժային գերատեսչությունների ղեկավարներին կրակել է սովորեցնում, մեքենայով «դրիֆտ» է անում, գերմաներեն է երգում, ռեպ է կարդում, հեծանիվ վարելով բասկետբոլ է խաղում։