Ֆրանսիան Հայաստանի կողքին է՝ ցույց տալու այն փաստը, որ Հայոց ցեղասպանությունը մեր համընդհանուր հիշողության մաս է կազմում. Լաքոթ
Հայաստանում Ֆրանսիայի դեսպան Ջոնաթան Լաքոթը ֆեյսբուքյան իր էջում գրառում է կատարել և նշել, որ ամեն տարի ապրիլի 24-ին հայերը հարգանքի տուրք են մատուցում Հայոց ցեղասպանության 1.5 միլիոն զոհերի հիշատակին:
«Ֆրանսիան, որն ապրիլի 24-ը հայտարարել է հիշատակի ազգային օր, Հայաստանի կողքին է՝ ցույց տալու այն փաստը, որ Հայոց ցեղասպանությունը մեր համընդհանուր հիշողության մաս է կազմում»,- գրել է դեսպանը:
Նա հիշեցրել է, որ ապրիլի 24-ը հիշատակի ազգային օր հռչակելու մասին մտադրությունը հայտարարել է Էմանուել Մակրոնը Ֆրանսիայի հայկական կազմակերպությունները համակարգող խորհրդի ամենամյա ընթրիքի ժամանակ:
«Այսօր ես Ֆրանսիայի դեսպանատան անունից ծաղկեպսակ եմ դրել Ցեղասպանության հուշահամալիրում»,- գրել է նա:
