Թրամփին չեն թույլատրի մասնակցել ԱՄՆ-ի խոշորագույն միջոցառումներից մեկին
Vogue նորաձևության հայտնի ամսագրի գլխավոր խմբագիր Աննա Վինտուրը հայտարարել է, որ ԱՄՆ-ի նախագահ Դոնալդ Թրամփին ոչ մի պարագայում թույլ չեն տա մասնակցել Նյու Յորքում կայանալիք նորաձևության ամենամյա Met Gala միջոցառմանը: Այս մասին հայտնում է Independent-ը:
Վինտուրի նախկին գործընկերուհին` Թինա Բրաունը, Նյու Յորքում կայացած լրագրողների «Աշխարհի կանայք» ժողովի ժամանակ հարց է ուղղել, թե ինչը կօգնի ԱՄՆ-ի նախագահին հրավերք ստանալ միջոցառմանը, ինչին ի պատասխան Վինտուրը նշել է. «Բացարձակ ոչինչ»:
Բացի այդ, Vogue-ը հրաժարվել է ամսագրի շապիկի համար լուսանկարել Թրամփի տիկնոջը` Մելանյա Թրամփին: Նշվում է, որ Աննա Վինտուրը Դեմոկրատական կուսակցության ակտիվ կողմնակից է: Հավելենք, որ Met Cala-2019 միջոցառումը կկայանա մայիսի 6-ին: