Լիանա Գյուրջյանը նվաճեց փոքր արծաթե մեդալ

Armsport.am-ը գրում է.

Բաթումիում ավարտին մոտեցող ծանրամարտի Եվրոպայի առաջնությունում մինչև 81 կգ քաշայինների կանանց պայքարում Հայաստանը ներկայացնող Լիաննա Գյուրջյանը պոկում վարժությունում գրանցել է 97 կգ արդյունք ու զբաղեցրել 4-րդ տեղը:

Իսկ ահա հրումը վարժությունում Գյուրջյանը նախ գլխավերևում պահեց 115 կգ, այնուհետև` 120 կգ կշռող ծանրաձողը:

Լիաննա Գյուրջյանը, չնայած ձախողել է վերջին մոտեցումը, բայց փոքր արծաթե մեդալ է նվաճել հրում վարժությունում:Երկամարտում գրանցած 217 կգ արդյունքով հայ մարզուհին գրավել է 4-րդ տեղը:

Հիշեցնենք` վերջերս Լաս Վեգասում կայացած ծանրամարտի աշխարհի պատանեկան առաջնության կանանց պայքարում Հայաստանի միակ ներկայացուցիչ Լիանա Գյուրջյանն արծաթե մեդալակիր էր դարձել 76 կգ քաշային կարգում:

Այսօր պայքարի դուրս կգա նաև Տաթև Հակոբյանը,որը մեդալի համար կպայքարի 87 կգ քաշային կարգում, որի A խմբի մրցումը կսկսվի Երևանի ժամանակով 18:00-ին:

Հիշեցնենք, որ նախօրեին Հայաստանը 2 մեդալ էր նվաճել երկամարտում: 89 կգ քաշային կարգում Հակոբ Մկրտչյանը նվաճել էր Եվրոպայի չեմպիոնի կոչումը, իսկ Դավիթ Հովհաննիսյանը դարձել էր բրոնզե մեդալակիր:

Ավելի վաղ Հայաստանի ներկայացուցիչներից Իզաբելլա Յայլյանը (59 կգ) պոկում վարժությունում նվաճել էր փոքր արծաթե մեդալ և 5-րդ տեղը գրավել երկամարտում, Արմեն Գրիգորյանը (73 կգ) 9-րդն էր, իսկ Ռաֆիկ Հարությունյանը (81 կգ)՝ 8-րդը:

2016թ.Եվրոպայի չեմպիոն Անդրանիկ Կարապետյանը (81 կգ) չէր կարողացել քաշ գցել և զրկվեց մրցմանը մասնակցելու իրավունքից:

Հայաստանի հավաքականի կազմում Բաթումի են մեկնել նաև Արփինե Դալալյանը (+87 կգ), Արսեն Մարտիրոսյանը և Սամվել Գասպարյանը (102 կգ), աշխարհի չեմպիոն, օլիմպիական փոխչեմպիոն Սիմոն Մարտիրոսյանը (109 կգ), օլիմպիական փոխչեմպիոն Գոռ Մինասյանն ու Ռուբեն Ալեքսանյանը (+109 կգ), որոնք հանդես կգան Եվրոպայի առաջնության վերջին օրը՝ ապրիլի 13-ին:

Պարգևատրման արարողությունը` ՀԱՕԿ-ի ներկայացրած տեսանյութում.