Էկվադորի նախագահն ասել է՝ ինչու Լոնդոնում երկրի դեսպանատունը որոշեց զրկել Ասանժին ապաստանից

Էկվադորի նախագահ Լենին Մորենոն Twitter սոցկայքում բացատրել է, թե ինչու է Լոնդոնում Էկվադորի դեսպանատունը որոշել նպաստել սկանդալային նյութերի հրապարակմամբ զբաղվող WikiLeaks կայքի հիմնադիր Ջուլիան Ասանժի ձերբակալությանը: Նա նշել է, որ պատճառն Ասանժի կողմից միջազգային հռչակագրերի պարբերական խախտումներն են եղել, գրում է korrespondent.net-ը:

«Էկվադորը որոշել է զրկել Ջուլիան Ասանժին դիվանագիտական ապաստանից միջազգային հռչակագրերի ու բնակության մասին պայմանագրի պարբերական խախտումների համար»,- գրել է Մորենոն իր էջում:

Նա չի մանրամասնել, թե կոնկրետ որ խախտումների մասին է խոսքը:

Հիշեցնենք, որ ապրիլի 11-ին Ասանժը ձերբակալվել է Լոնդոնում Էկվադորի դեսպանատանը՝ 2012 թվականին Վեսթմինսթերյան դատարանի կողմից տրված որոշման հիման վրա:

Ապրիլի 5-ին WikiLeaks-ը հայտարարել էր, որ Ասանժին պատրաստվում են առաջիկա օրերին վտարել Էկվադորի դեսպանատնից: Դրա պատճառն իբր Մորենոյի անունը շոշափող օֆշորային փաստաթղթերի հետ կապված կոռուպցիոն սկանդալն է:

Հիշեցնենք, որ Ասանժը Լոնդոնում Էկվադորի դեսպանատանն էր գտնվում 2012 թվականից: Նա մտավախություն ունի, որ իրեն ձերբակալությունից հետո կարող են արտահանձնել ԱՄՆ-ին, որտեղ նրան մեղադրում են պետական գաղտնի փաստաթղթեր հրապարակելու համար: Նրան սպառնում է մինչև 35 տարվա ազատազրկում կամ մահապատիժ: