Էրդողանի կուսակցությունը դիմել է ԿԸՀ-ին՝ Ստամբուլում նոր ընտրություններ անցկացնելու հայցով
Թուրքիայի նախագահ Ռեջեփ Թայիփ Էրդողանի գլխավորած «Արդարություն եւ զարգացում» կուսակցությունը երեքշաբթի օրը դիմել է Բարձրագույն ընտրական հանձնաժողովին՝ Ստամբուլում նոր քաղաքային ընտրություններ անցկացնելու հայցով՝ հայտնում է ՏԱՍՍ-ը՝ հղում կատարելով NTV-ին։
Միաժամանակ, մարտի 31-ին թուրքական առաջնորդը խոստացել էր, որ հաջորդ ընտրությունները երկրում կանցկացվեն միայն 2023թ․։ Այդ տարի պետք է կայանան հերթական նախագահական եւ խորհրդարանական ընտրությունները։
Մարտի 31-ին Թուրքիայում անցկացվել են քաղաքային ընտրություններ, որոնց ընթացքում ընտրողները ընտրել են քաղաքապետների, տարածաշրջանային խորհրդարանների, խորհուրդների, գյուղական ավագանիների եւ գյուղական խորհուրդների անդամների։
Ստամբուլի քաղաքապետի ընտրությունների արդյունքների բողոքարկումը դեռեւս ԿԸՀ-ն դիտարկում է։ Էրդողանը հայտարարում է բազմաթիվ խախտումների մասին, ընդդիմությունը պնդում է, որ նույնիսկ վերահաշվարկից հետո արդյունքները կլինեն իրենց թեկնածուի՝ Էկրեմ Իմամօղլու օգտին։ Նախնական ոչ պաշտոնական տվյալներով, նա 14 հազար ձայնով առաջ է անցել իշխող կուսակցության թեկնածուից՝ խորհրդարանի խոսնակ, նախկին վարչապետ Բինալի Յիլդիրիմից։