Google-ն Ավստրալիայում անօդաչու թռչող սարքերի միջոցով առաքման բիզնես կգործարկի
Ամերիկյան Google տեխնոլոգիական ընկերությունը ցանկանում է անօդաչու թռչող սարքերի միջոցով առաքման բիզնես գործարկել, հայտնում է The Guardian-ը՝ մանրամասնելով, որ Project Wing նախագիծն արդեն հավանություն է ստացել Ավստրալիայի մայրաքաղաք Կանբերրայի օդային տարածքում նման գործունեություն ծավալելու համար:
Նախորդ 18 ամսվա ընթացքում Project Wing-ի շրջանակում փորձարկվել է Կանբերրայում մթերքի, ըմպելիքների, դեղորայքի, սուրճի և շոկոլադի առաքումը:
Իշխանություններն իրենց համաձայնությունը տվել են, երբ համապատասխան մասնագետներն ամենայն մանրամասնությամբ ուսումնասիրել են անօդաչուների ապահովությունը և անվտանգությանն առնչվող բոլոր հարցերը:
Ըստ իշխանությունների՝ անօդաչուների մասնակցությամբ առաքումները որևէ վտանգ չեն ներկայացնում մարդկանց, անշարժ գույքի կամ օդում գտնվող ինքնաթիռների համար:
Միևնույն ժամանակ նշվում է, որ անօդաչուներին թույլատրվել է աշխատել միայն ցերեկային ժամերին, ինչպես նաև արգելվել է թռչել խոշոր ավտոճանապարհների վրայով և նվազագույն հեռավորություն պահպանել մարդկանցից:
Ըստ նախնական հաշվարկի՝ նոր բիզնեսը կարող է տարեկան հավելյալ 30-40 մլն դոլարի եկամուտ ապահովել: