Լորդերի պալատը հավանության է արժանացրել Brexit-ի հետաձգման օրենսդրական նախագիծը

Բրիտանական խորհրդարանի Լորդերի պալատը երկուշաբթի օրը հավանության է արժանացրել Եվրոպական միությունից Միացյալ Թագավորության դուրս գալը հետաձգելու մասին օրենսդրական նախագիծը՝ հայտնում է ՏԱՍՍ-ը։

Նախագծի մշակողը Համայնքների պալատի լեյբորիստ պատգամավոր Իվետ Կուպերն է։ Ավելի վաղ ստորին պալատը մի ձայնի առավելությամբ էր հավանության արժանացրել նրա առաջարկած փաստաթուղթը։ Այժմ Լորդերի պալատի դրական գնահատականից հետո նախագիծը կվերադառնա ստորին պալատ եւ, ինչպես ակնկալվում է, կարող է հավանության արժանանալ այստեղ։ Դրանից հետո օրենքի կարգավիճակ ստանալու համար նրան անհրաժեշտ կլինի միայն թագավորական թույլտվությունը, սակայն դա ձեւական բնույթ կկրի։

Ինչպես նշվում է օրինագծում, օրենք դառնալու հաջորդ օրը վարչապետ Թերեզա Մեյը պետք է նշի Brexit-ի իրականացման նոր վերջնաժամկետ։ Այնուհետեւ այդ ժամկետը նույնպես պետք է արժանանա խորհրդարանի հավանությանը, որից հետո ԵՄ-ին համապատասխան հարցում կարվի։ Եվրոպական միությունն իր հերթին կարող է ընդունել կամ մերժել առաջարկը։

Սակայն իրավիճակը հետաքրքիր է նրանով, որ Մեյն արդեն անցել է այդ ճանապարհով՝ չսպասելով հիշատակված օրենքին։ Անցյալ ուրբաթ նա նամակով դիմել էր Եվրոպական խորհրդի նախագահ Դոնալդ Տուսկին՝ խնդրելով ԵՄ-ից Միացյալ Թագավորության դուրս գալը ապրիլի 12-ից հետաձգել մինչեւ հունիսի 30-ը։ Սակայն Բրյուսելը համաձայն է միայն երկարաժամկետ հետաձգման՝ մինչեւ հաջորդ տարվա մարտի վերջը։