Հարավային Կորեայի իշխանությունները հայտարարել են ազգային աղետի մասին՝ կապված անտառային հրդեհների հետ (ֆոտո)

Հարավային Կորեայի իշխանությունները հայտարարել են ազգային աղետի մասին՝ կապված գրեթե ամբողջ երկիրն ընդգրկած անտառային հրդեհների հետ:

AFP-ն հայտնում է, որ նախօրեին ուշ երեկոյան կրակը բռնկվել է Գոզոնգ քաղաքում ճանապարհի երկայնքով: Սակայն ուժգին քամու պատճառով կրակն արագ տարածվել է լեռնային շրջաններում՝ այրելով 400 տուն եւ 500 հա հող:

Տարհանվել է մոտ 4 հազար մարդ, մեկը զոհվել է, 11-ը՝ վնասվածքներ ստացել:

Ազգային հակահրդեհային գործակալությունը հայտնել է, որ կրակի դեմ պայքարելու համար ուղարկվել է ավելի քան 780 հրշեջ մեքենա եւ փրկարար ծառայության մոտ 10 հազար աշխատակից: Զինվորականներն օգնության են ուղարկել 32 ուղղաթիռ, ինչպես նաեւ սեփական հրշեջ մեքենաները եւ 16 հազար 500 զինվորի: Հաջողվել է հիմնական հրդեհը վերահսկողության տակ վերցնել, սակայն մյուսները դեռ շարունակում են այրվել:

Կենտրոնական կառավարությունը հայտարարել է ազգային աղետի մասին՝ տուժած շրջաններին տրամադրելով հատուկ օգնություն, ներառյալ ապրանքներ եւ սարքավորումներ, եւ արգելելով վտանգավոր գոտիներ մուտքը:

Սեուլը վերջին անգամ նման հայտարարություն էր կատարել 2007 թվականին, երբ արեւմտյան առափնյա հատվածում նավթ էր թափվել: