Գամբիայի նախկին նախագահը մոտ 1 մլրդ դոլար է գողացել նախքան երկրից փախչելը
Լրագրողական հետաքննության արդյունքում պարզվել է, որ Գամբիայի նախկին նախագահ Յահյա Ջամեհը մոտ 1 մլրդ դոլար է գողացել նախքան 2017թ. երկրից փախուստի դիմելը:
Ինչպես նշում է The Guardian-ը, լրագրողներն այս մասին պարզել են հազարավոր փաստաթղթերի ուսումնասիրության արդյունքում:
Նշվում է, որ 1 մլրդ դոլարի գողությունն իրականացվել է մի քանի տարվա ընթացքում. նախկին զինվորական Ջամեհը, որը հեղաշրջման արդյունքում իշխանության էր եկել 1994թ., 2017թ. պարտվել էր ընտրություններում ու ստիպված եղել փախուստի դիմել:
Յուրացված գումարի մի մասը նախագահն օգտագործել էր իր համար ցոփ ու շվայտ կյանք ապահովելու համար: Օրինակ՝ նա իր համար մասնավոր մզկիթ էր կառուցել, ինչպես նաև հայտնի փոփ երգիչ Մայքլ Ջեքսոնի մահից հետո նրա հիշատակին նվիրված մեծ համերգ կազմակերպել:
Հայտնի է, որ ԱՄՆ նախագահ Դոնալդ Թրամփի վարչակազմը Ջամեհի նկատմամբ պատժամիջոցներ է սահմանել մարդու իրավունքների լուրջ խախտումների, կոռուպցիայի, կտտանքների, սպանությունների իրագործման համար: Պետդեպն արգելել է նրա և նրա ընտանիքի մուտքն ԱՄՆ: