«Թրամփի վարչակազմն առաջիկա 5 տարում տիեզերագնացիներին դեպի Լուսին կուղարկի». ԱՄՆ փոխնախագահ
Միացյալ Նահանգների փոխնախագահ Մայք Փենսը հայտարարել է, որ նախագահ Դոնալդ Թրամփի վարչակազմը պատրաստ է առաջիկա 5 տարում ամերիկացի տիեզերագնացներին դեպի Լուսին ուղարկել, գրում է The Hill-ը:
«Ինչպես 20-րդ դարում ԱՄՆ-ն դարձավ Լուսնի վրա ոտք դրած առաջին պետությունը, այնպես էլ 21-րդ դարում կլինի առաջինը»,-Ալաբամա նահանգում Ազգային տիեզերական խորհրդի հանդիպման ժամանակ ասել է Փենսը:
Նա հավելել է, որ «Լուսնի վրա ոտք դրած առաջին կինն ու հաջորդ տղամարդը լինելու են ամերիկացիներ, որոնք տիեզերք են թռչելու ամերիկյան հրթիռներով՝ ամերիկյան հողից»:
ԱՄՆ փոխնախագահը, որը նաև զբաղեցնում է Ազգային տիեզերական խորհրդի նախագահի պաշտոնը, իր խոսքում մանրամասնել է, որ Թրամփի վարչակազմը ՆԱՍԱ-ին (Օդագնացության և տիեզերական տարածության հետազոտությունների ազգային գործակալություն) կարգադրել է հնարավոր ամեն գնով առաջիկա հինգ տարում դեպի Լուսին մարդ ուղարկել:
Փենսը նախազգուշացրել է, որ այս նպատակի ձախողումն ընդունելի տարբերակ չի կարող լինել: