Մոնտենեգրոյի կղզիներից մեկում գտնվող նախկին բանտը, որտեղ 130 մարդ է սպանվել, ճոխ հյուրանոցի կվերածվի (լուսանկարներ)

Մոնտենեգրոյի (Չեռնոգորիա) ափերի մոտ գտնվող կղզիներից մեկի ամրոցը, որը քաղբանտարկյալների համար կալանավայր է ծառայել, 5 աստղանի ճոխ հյուրանոցի կվերածվի, գրում է Daily Mail-ը:

Լաստավիկա կղզու ամրոցը կառուցվել է 19-րդ դարում: Երկրորդ աշխարհամարտի տարիներին այն օկուպացվել է իտալացի զինվորների կողմից, որոնք այնտեղ մոտ 2000 բանտարկյալ են տեղավորել:

Պատերազմից հետո կղզին լքվել է, իսկ ամրոցը՝ մնացել բարձիթողի վիճակում: 2016թ.-ին Մոնտենեգրոյի իշխանություններն այն վարձույթով Orascom շինարարական ընկերությանն են տրամադրել, որն էլ սկսել է հյուրանոցի շինարարությունը:

Նախատեսվում է, որ հյուրանոցի ստեղծումը Մոնտենեգրոյում մոտ 200 նոր աշխատատեղ կբացի և 15 տարվա կտրվածքով 7,5 մլն եվրո եկամուտ կբերի երկրի բյուջեին:

Հյուրանոցը կունենա 23 սենյակ և սպա սրահ: Ներսում կտեղադրվի նաև նախկին բանտում սպանված կամ սովամահ արված 130 բանտարկյալներին նվիրված հուշարձան, ինչպես նաև կղզու պատմությունը ներկայացնող թանգարան:

Մշակութային ժառանգության բազմաթիվ ջատագովներ քննադատել են երկրի իշխանությունների ծրագիրը՝ պնդելով, որ վայրը, որը ժամանակին համակենտրոնացման ճամբարի դեր է կատարել, չպետք է այդ կերպ շահագործվի, ոմանք էլ ասել են, որ կղզին հարուստների դրախտավայր կդառնա և այլևս Մոնտենեգրոյի ժողովրդին չի պատկանի: