Չինաստանը ԵՄ-ին կոչ է արել «շահավետ մրցակցությունը» չվերածել «հակամարտության»
Չինաստանը Եվրոպական միությանը կոչ է արել երկու գործընկերների միջեւ «շահավետ մրցակցությունը» չվերածել «հակամարտության»։ Դա տեղի է ունեցել այն բանից հետո, երբ Բրյուսելը մտադրվել է անցնել Պեկինի հետ ավելի ագրեսիվ հարաբերությունների՝ հայտնում է AP-ը։
Նախօրեին բարձրաստիճան եվրոպական քաղաքական գործիչները հրապարակել են Պեկինի հետ հարաբերությունների 10 կետից բաղկացած պլան՝ կապված չինական ներդրումների եւ հույժ կարեւոր ենթակառուցվածքների վրա ազդեցության հետ։
Չինաստանը միաժամանակ ե՛ւ գործընկեր ե՛ւ «տնտեսական մրցակից է տեխնոլոգիական առաջատարության հարցում, ե՛ւ համակարգային մրցակից, որն առաջ է քաշում կառավարման այլընտրանքային մոդելներ»՝ հայտարարել է ԵՄ-ն՝ ընդհանուր գծերով ներկայացնելով իր պլանը։
Չինաստանի արտգործնախարարության ներկայացուցիչ Լու Կանգը ի պատասխան հայտարարել է, որ գլոբալիզացիայի դարաշրջանում տարատեսակ տնտեսական համակարգերի միջեւ գոյություն կունենա բարենպաստ մրցակցություն։ «Մենք չենք ուզում, որ մրցակցությունը վերածվի հակամարտության»,- ասել է նա։
Նրա խոսքերով, Պեկինը հուսով է, որ Բրյուսելը կարող է տեսնել «Չինաստանի բարեփոխումների ու անկեղծության նոր փուլը, եւ Չինաստանի հետ արդար եւ ռացիոնալ աշխատել Չինաստան-ԵՄ հարաբերությունների առաջխաղացման ուղղությամբ»։