Սահմանապահները չեն պատրաստվում ապրիլին Ուկրաինա թողնել Սաակաշվիլուն
Ուկրաինացի սահմանապահները թույլ չեն տա, որպեսզի Վրաստանի նախկին նախագահ Միխայիլ Սաակաշվիլին ապրիլի 1-ին՝ պետության ղեկավարի ընտրությունների հաջորդ օրը, մտնի Ուկրաինայի տարածք։ Այս մասին ասել է Պետական սահմանապահ ծառայության խոսնակ Օլեգ Սլոբոդյանը։
«Սույն անձը Ուկրաինայի քաղաքացի չէ, եւ մինչեւ 2021 թվականը նրա Ուկրաինա մուտքի համար հիմքեր չկան»,- ասել է Սլոբոդյանը «Ուկրաինա ВВС»-ին։
Ավելի վաղ Սաակաշվիլին, ի հաստատումն Ուկրաինա վերադառնալու մասին իր խոսքերի, ցույց էր տվել էլեկտրոնային տոմսը ուկրաինական հեռուստաալիքներից մեկով։
2015 թվականի մայիսին Սաակաշվիլին ստացել է Ուկրաինայի քաղաքացիություն, 2015 թվականի դեկտեմբերին դադարեցվել է նրա վրացական քաղաքացիությունը։ 2017 թվականի հուլիսի 26-ին Պյոտր Պորոշենկոն զրկեց Սաակաշվիլուն Ուկրաինայի քաղաքացիությունից։ 2018 թվականի փետրվարի 12-ին Վրաստանի նախկին նախագահը կալանվեց Կիեւում, իսկ հետո արտաքսվեց Լեհաստան։ Այնտեղ նա հայտարարեց, թե չի հրաժարվի Ուկրաինա վերադառնալու փորձերից։ Ուկրաինայի Պետական սահմանապահ ծառայությունն արգելել է Սաակաշվիլուն մինչեւ 2021 թվականը մտնել երկիր։