Վրաստանի տարածքով Հայաստան մատակարարվող ռուսական գազի տրանզիտի գինը բարձրացել է
Վրաստանի էկոնոմիկայի եւ կայուն զարգացման փոխնախարար Նաթիա Տուրնավան ներկայացրել է վրացական տարածքով Հայաստանին գազի մատակարարման տրանզիտի մասին ռուսական «Գազպրոմ» ընկերության հետ համաձայնագրի մանրամասները՝ հայտնում է «Sputnik-Գրուզիա»-ն։
«Չնայած շատ բարդ եւ շարունակական բանակցություններին՝ մենք ղեկավարվել ենք երկու հիմնական սկզբունքներով, եւ երկուսն էլ պահպանվել են։ Առաջին հերթին՝ դա էներգետիկ անկախությունն է եւ Վրաստանի անվտանգությունը»,- ճեպազրույցում ասել է Տուրնավան։
Նրա խոսքերով, վրացական կողմին հաջողվել է հասնել որոշակի հաջողությունների։ Նա նշել է, որ տրանզիտի արժեքը մեծացել է, իսկ ռուսական գազի գնման արժեքը՝ նվազել։ «Դա այն դեպքում, եթե մասնավոր բիզնեսը հետաքրքրվի այդ այլընտրանքով»,- նշել է փոխնախարարը։
Ինչ վերաբերում է գներին, Տուրնավան, դրանք չի հստակեցրել։ «Թվեր ասել ես չեմ կարող։ Հենց դա է կոմերցիոն գաղտնիքի էությունը, որպեսզի որոշակի թվեր չնշվեն, սակայն ես ասում եմ դինամիկայի մասին, որը երկու դեպքում էլ մեր օգտին է»,- ընդգծել է նա։