Եվրախորհրդարանը Ժան Մարի Լը Պենին զրկել է պատգամավորական անձեռնմխելիությունից
Եվրախորհրդարանը քվեարկել է «Ազգային ճակատ» ֆրանսիական ծայրահեղ աջ կուսակցության հիմնադիր Ժան Մարի Լը Պենին պատգամավորական անձեռնմխելիությունից զրկելու օգտին՝ Եվրախորհրդարանում ֆիկտիվ աշխատատեղերի ստեղծման մասին գործի կապակցությամբ: Համապատասխան բանաձեւով քվեարկությունը կայացել է երեքշաբթի Ստրասբուրգի նստաշրջանում, հաղորդում է ՏԱՍՍ-ը:
Պատգամավորները նաեւ կողմ են արտահայտվել պատգամավոր Դոմինիկ Բիլդին պատգամավորական անձեռնմխելիությունից զրկելու համար: Նա ներգրավված է նույն գործում:
Բանաձեւում ասվում է, որ 2018 թվականի սեպտեմբերին Ֆրանսիայի Արդարադատության նախարարությունը դիմել է եվրոպացի պատգամավորներին Լը Պենին անձեռնմխելիությունից զրկելու համար՝ Եվրախորհրդարանում ֆիկտիվ աշխատատեղերի ստեղծման մասին գործի հետաքննության կապակցությամբ:
Քաղաքական գործիչը կասկածվում է որոշակի սխեմայի ստեղծման մեջ. որոշ աշխատակիցներ, որոնք «Ազգային ճակատի» պատգամավորների օգնականներ են, իրականում չեն աշխատել Եվրախորհրդարանում, իսկ նրանց աշխատավարձերն անմիջականորեն փոխանցվել են կուսակցության գանձարան:
2018 թվականի հունիսին Լը Պենը հրաժարվել էր ընդունել նրանից ցուցմունքներ վերցնելու համար ժամանած Կոռուպցիայի եւ ֆինանսական խախտումների դեմ պայքարի գլխավոր վարչության երկու աշխատակիցներին՝ իր մերժումը պատճառաբանելով պատգամավորական անձեռնմխելիությամբ: ԵՄ դատարանն ավելի վաղ հայտնել էր, որ Լը Պենը պարտավոր է Եվրախորհրդարանին 320 հազար դոլար վերադարձնել, որոնք անհիմն կերպով ստացվել են օգնականների աշխատավարձերի տեսքով:՚
Կուսակցության ներկայացուցիչների կողմից Եվրախորհրդարանում ֆիկտիվ աշխատատեղերի ստեղծման մասին գործը քննիչների կողմից սկսվել էր 2016 թվականին: