Պետդեպում չեն բացառում ԱՄՆ-ի եւ ԿԺԴՀ-ի առաջնորդների երրորդ հանդիպումը
Պետդեպում չեն բացառում Միացյալ Նահանգների եւ Հյուսիսային Կորեայի առաջնորդների երրորդ հանդիպումը։ Այս մասին հայտարարել է պետքարտուղարի սպառազինությունների եւ միջազգային անվտանգության վերահսկման հարցերով տեղակալ Անդրեա Թոմփսոնը՝ հայտնում է Reuters-ը։
«Պետքարտուղարը եւ նախագահը բաց են երկխոսության համար։ Որոշակի ամսաթիվ գրաֆիկում չկա, սակայն մեր թիմերը շարունակում են աշխատել դրա շուրջ»,- ասել է նա, երբ հարցրել են, թե կլինի արդյոք Դոնալդ Թրամփի եւ Կիմ Չեն Ընի երրորդ գագաթաժողովը։
Նախօրեին ազգային անվտանգության հարցերով ԱՄՆ նախագահի խորհրդական Ջոն Բոլթոնը հայտարարել էր, թե նախագահը պատրաստ է Կիմ Չեն Ընի հետ երրորդ հանդիպմանը, սակայն դրա համար կարող է շատ ժամանակ պահանջվել։