Գերմանիան կշարունակի ճնշում գործադրել Թուրքիայի վրա
Գերմանիայի կառավարությունը կշարունակի ճնշում գործադրել Թուրքիայի վրա՝ արտասահմանցի լրագրողներին երկրում աշխատելու անհրաժեշտ իրավասությունների տրամադրման համար՝ հայտնում է AP-ն։
Երկու գերմանացի լրագրողներ, որոնց մերժել են Թուրքիայում աշխատելու արտոնագիր տրամադրել, կիրակի օրը ստիպված են եղել լքել երկիրը, ինչը գերմանացի պաշտոնյաների բողոքների պատճառ է դարձել։
ԳԴՀ կառավարության պաշտոնական ներկայացուցիչ Շտեֆան Զայբերտը հայտարարել է․ «Մեզ համար այդ երկու լրագրողների գործը նրանց մեկնելով չի ավարտվում։ Մենք պետք է շարունակենք ներկայացնել նրանց շահերը»։
Զայբերտը Թուրքիայի կառավարությանը կոչ է արել «արագ լուծում գտնել գերմանացի եւ եվրոպացի լրագրողների համար, որոնք դեռ սպասում են իրենց արտոնագրման մասին նորությունների»։
Պատասխանելով լրագրողների հետ կապված իրավիճակի մասին հարցին՝ Զայբերտն ասել է, որ Գերմանիան «շատ լավ է հասկանում Թուրքիայում ազատ լրագրողության հետ կապված բարդ իրավիճակը»։