2021 թվականին ԵՄ երկրներն ամբողջովին կանցնեն ամառային ժամանակին
Եվրախորհրդարանը սատարել է Եվրահանձնաժողովի առաջարկը՝ 2021 թվականից ամեն տարի ամառային և ձմեռային ժամանակին անցնելու դադարեցման վերաբերյալ, հաղորդում է ՌԻԱ Նովոստի-ն՝ հղում կատարելով «ԵվրոՊուլս»-ին:
Ըստ Եվրահանձնաժողովի պատվերով անցկացված հարցման տվյալների՝ եվրոպացիների ավելի քան 80 տոկոսը ցանկանում է ապրել ամբողջ տարի նույն ժամանակով (ենթադրաբար, ամառային ժամանակով): Համարվում էր, որ ամառային և ձմեռային ժամերին անցումը կրճատում է էլեկտրականության ծախսերը: Սակայն, 2017 թվականին Եվրախորհրդարանի պատվիրած հարցման տվյալների համաձայն, խնայողությունը կազմում է 0.5-ից 2.5 տոկոս: Ըստ որում՝ ժամերը փոխելու օրերին մարդկանց ինքնազգացողությունը վատթարանում է. ճանապարհներին ավտովթարների թիվն ավելանում է:
Ամառային ժամանակին անցում կատարելու վերջնական որոշումը կայացնելու համար անհրաժեշտ է ազգային մակարդակում ԵՄ անդամ պետությունների հաստատումը: Ակնկալվում է, որ ԵՄ երկրների իշխանությունները կզբաղվեն այդ հարցով ընթացիկ տարում: Այդ դեպքում 2021 թվականից Եվրամիությունում կդադարեն փոխել ժամերը:
Այս տարի առաջին անգամ Եվրոպայում ժամերը փոխելու են մարտի 30-ի լույս մարտի 31-ի գիշերը: