Ամերիկացի կոնգրեսականներն ԱՄՆ-ի և Արցախի միջև անարգել շփման և բաց հաղորդակցության վերաբերյալ բանաձև են ներկայացրել
Ամերիկացի կոնգրեսական, Կոնգրեսում հայկական հարցերով հանձնաժողովի համանախագահ Ֆրենք Փալոունը Ներկայացուցիչների պալատի մի շարք գործընկերների հետ ներկայացրել է բանաձև, որի նպատակն է վերացնել Միացյալ Նահանգների և Արցախի միջև անարգել ուղևորություններին և բաց հաղորդակցությանը խոչընդոտող արհեստական արգելքները:
Ինչպես հայտնում է Asbarez-ը, բանաձևի ներկայացման հարցում դեմոկրատ Փալոունին աջակցել են ինչպես նրա կուսակիցները, այնպես էլ հանրապետականները:
Բանաձևի ներկայացմանն է անդրադարձել ԱՄՆ-ի Հայ դատի հանձնախմբի նախագահ Րաֆֆի Համբարյանը, որը կոնգրեսականներին շնորհակալություն է հայտնել այդ քայլի համար:
«Տասնամյակներ առաջ Ադրբեջանի ճնշման տակ ԱՄՆ-ի հաստատած «ժամկետանց» և թերի արգելքները կանխում են ուղղակի երկխոսությունը՝ արհեստականորեն շղթայելով մեր դիվանագետների ձեռքերն ու արգելափակելով դեպի խաղաղություն տանող ճանապարհը»,-ասել է Համբարյանը:
Աղբյուրը մանրամասնում է, որ բանաձևի հեղինակները կոչ են անում ամերիկյան իշխանություններին թույլ տալ բոլոր աստիճանի պաշտոնյաներին ուղևորվել Արցախի Հանրապետություն, բաց և ուղղակի շփում ունենալ արցախցի գործընկերների հետ, խրախուսել Արցախի պաշտոնյաների և Միացյալ Նահանգների իշխանության գործադիր ու օրենսդիր ճյուղերի, քաղհասարակության ներկայացուցիչների ուղիղ շփումը, աջակցել Արցախի Հանրապետության՝ ժողովրդավար ճանապարհով ընտրված կառավարության լիարժեք և ուղիղ մասնակցությանն իր ապագայի վերաբերյալ ԵԱՀԿ և այլ ձևաչափերով բանակցություններին: