ԱՄՆ-ը չի բացառում Մադուրոյին սատարող երկրների նկատմամբ պատժամիջոցների կիրառումը
Ամերիկյան վարչակազմը դեռ որոշում չի կայացրել միակողմանի պատժամիջոցներ կիրառելու մասին այն պետությունների նկատմամբ, որոնք սատարում են Վենեսուելայի նախագահ Նիկոլաս Մադուրոյին, սակայն չի բացառում ապագայում այդ մեխանիզմի գործադրման հավանականությունը: Այդ մասին հայտարարել է Վենեսուելայի հարցով ԱՄՆ-ի հատուկ ներկայացուցիչ Էլիոթ Աբրամսը, հաղորդում է ՏԱՍՍ-ը:
«Երկրորդային պատժամիջոցներ կիրառելու հավանականությունը միշտ առկա է: Եւ ես չէի ցանկանա եզրակացություններ անել, թե արդյոք մենք այդպես կվարվենք, ինչը մեզ կստիպի այդպիսի լրացուցիչ որոշում կայացնել»,-ասել է դիվանագետը: Նա մեկնաբանել է հարցը, թե Վենեսուելայի հետ կապված իրավիճակում ԱՄՆ-ը դիտարկում է արդյոք պատժամիջոցների կիրառման տարբերակը, մասնավորապես, Ռուսաստանի, Կուբայի եւ Հնդկաստանի նկատմամբ:
Բացի այդ, Ադամսը հավաստիացրել է, որ վերջին ամիսներին Վենեսուելայի նկատմամբ Վաշինգտոնի կիրառած պատժամիջոցները հետագայում կարող են չեղարկվել:
« Պատժամիջոցները կիրառելիս մենք ասում էինք, որ դա ժամանակավոր է: ԱՄՆ-ի ֆինանսների նախարարության կողմից բոլոր ծանուցումները [պատժամիջոցների գործադրման մասին] վկայում էին, որ դրանք կարող են չեղարկվել: Նպատակն է ստիպել մարդկանց փոխել իրենց վարքագիծը: Այդ պատճառով կիրառելով պատժամիջոցներ եւ չեղարկելով [Ամերիկա մուտք գործելու] վիզաները [վենեսուելացիների մի շարք կատեգորիաների շրջանում]՝ մենք պարզորեն հասկացնում ենք, որ այդ քայլերը հետադարձելի են, եթե փոխվեն վարքագծի սխեմաները»,-նշել է Աբրամսը: