Հնդկաստանը Պակիստանին «սարսափելի հետեւանքներով» է սպառնում Քաշմիրում գնդակոծությունը շարունակելու համար. լրատվամիջոց
Հնդկաստանը Պակիստանից պահանջել է անմիջապես դադարեցնել վիճելի Քաշմիրի՝ Նյու Դելիի վերահսկողության տակ գտնվող տարածքի գնդակոծությունը, որի հետեւանքով առնվազն 4 խաղաղ բնակիչ է զոհվել: Հինգշաբթի NDTV-ն, վկայակոչելով աղբյուրին, հայտնել է, որ հնդկական կողմը հայտարարել է, որ գնդակոծությունների եւ սադրանքների շարունակումը պակիստանյան կողմի համար «սարսափելի հետեւանքներով» կշրջվի:
Ըստ տեղեկությունների՝ 2 երկրների բանակային հրամանատարության ներկայացուցիչները զրուցել են արտահերթ կապի համակարգով, որի ժամանակ Հնդկաստանը պահանջել է Վերահսկման գծում դադարեցնել խաղաղ բնակիչներին ուղղված կրակոցները: Ավելի վաղ Նյու Դելին Պակիստանին մի քանի անգամ մեղադրել էր Քաշմիրում գնդակոծության մեջ՝ հրետանու եւ նռնականետերի օգտագործմամբ: Հնդկաստանի տեղեկություններով՝ վերջին շաբաթվա ընթացքում սպանվել է առնվազն 4 խաղաղ բնակիչ, այդ թվում՝ 2 երեխա: Ի պատասխան՝ Իսլամաբադը հնդկական կողմին մեղադրել է «չսադրված գնդակոծության» մեջ:
NDTV-ի աղբյուրները հայտնել են, որ Պակիստանը Վերահսկման գծի երկայնքով լրացուցիչ զորքեր եւ մարտական տեխնիկա է տեղակայում: Ըստ այս տեղեկության՝ Իսլամաբադը ստորաբաժանումներ է բերում Աֆղանստանի սահմանից:
Ներկայումս Հնդկաստանի եւ Պակիստանի միջեւ լարվածությունը պահպանվում է փետրվարի 14-ին Ջամու եւ Քաշմիր նահանգում հնդիկ զինվորների ավտոշարասյան վրա հարձակման պատճառով: Հարձակման պատասխանատվությունը, որը խլել էր 40 մարդու կյանք, ստանձնել է «Ջաիշ-ե-Մուհամմադ» խմբավորումը, որը հանդես է գալիս Հնդկաստանից նահանգի անջատման օգտին: Նյու Դելիում Իսլամաբադին մեղադրել են այս խմբավորման գրոհայիններին աջակցելու մեջ: