Աշխարհի խորհրդարաններում կին պատգամավորներն ավելի շատ են դառնում

Աշխարհի խորհրդարաններում կին պատգամավորների թիվը թեեւ դանդաղ, սակայն ավելանում է եւ անցյալ տարի 50 երկրներում անցկացված ընտրությունները հաստատել են այդ միտումը: Կանանց միջազգային օրվա նախաշեմին այս մասին նշվում է Ժնեւում հրապարակված Միջխորհրդարանական միության զեկույցում, գրում է ՏԱՍՍ-ը:

«2018 թվականի ընտրությունները համախմբել են վերջին տարիներին խորհրդարաններում կանանց ներկայացուցչության շատ ձեռքբերումներ: Խորհրդարաններում կանաց համաշխարհային մասնաբաժինը թեեւ դանդաղ, բայց շարունակում է աճել»:

Միջինում անցյալ տարի այդ ցուցանիշն աճել է 0.9 տոկոսով: 2017-ին խորհրդարաններում կանանց թիվը կազմել է 23.4 տոկոս, իսկ 2018-ին՝ 24.3 տոկոս: Նշենք, որ 2008-ին այդ ցուցանիշը հավասար էր 18.3-ի:

Այն երկրներում, որտեղ իշխանության ներկայացուցչական մարմիններում գենդերային քվոտաներ են նախատեսված, միապալատ խորհրդարաններում կին պատգամավորների մասնաբաժինը բարձր է 7 տոկոսով, խորհրդարանների վերին պալատներում՝ 17 տոկոսով: Գենդերային քվոտաներն այժմ գործում են ավելի քան 130 խորհրդարաններում:

Միջխորհրդարանական միության նախագահ Գաբրիելա Կուեվաս Բարոնը նշել է, որ խորհրդարաններում կանանց թվի ավելացումը նշանակում է «ժողովրդավարության ներկայացուցչության բարձրացում եւ ուժեղացում»:

Ընտրովի օրենսդիր մարմիններում կանանց ներկայացուցչության մակարդակով առաջատար է Լատինական Ամերիկան (30,6 տոկոս): Եվրոպայում այդ ցուցանիշը կազմում է 28.5 տոկոս, Ասիայում՝ 19.6 տոկոս, Հյուսիսային Աֆրիկայի եւ Մերձավոր Արեւելքի երկրներում՝ 18.1 տոկոս:

Միջխորհրդարանական միությունը ամենահին եւ ամենահեղինակավոր եւ ազդեցիկ միջազգային կազմակերպություններից մեկն է: Այն միավորում է 178 երկրների խորհրդարաններ, ինչպես նաեւ 12 միջխորհրդարական ասամբլեաներ՝ որպես ասոցիացված անդամներ: