Էրդողանն «աղբ» է անվանել երկրի ընդդիմությանը
Թուրքիայի նախագահ Ռեջեփ Թայիփ Էրդողանն «աղբ» է անվանել երկրի գլխավոր ընդդիմադիր ուժը համարվող Ժողովրդահանրապետական կուսակցությանը՝ պնդելով, որ նրանց իշխանության տարիներին Ստամբուլի ամեն անկյունում «աղբի սարեր ու ցեխ» էր:
Ինչպես գրում է թուրքական demokrathaber.org կայքը, Թուրքիայի նախագահը նման հայտարարություն է արել ՏԻՄ ընտրություններին ընդառաջ Ստամբուլի Սանջաքթեփե շրջանում կազմակերպված հանրահավաքի ժամանակ:
«Դեռ 1994-ին եմ ասել՝ Ժողովրդահանրապետական կուսակցություն նշանակում է աղբ, ցեխ, փոս: Ստամբուլի ամեն անկյունում աղբի սարեր չէի՞ն: Ամեն կողմը ցեխ չէ՞ր», - ասել է Էրդողանը:
Նա նաև կոչ է արել ժողովրդահանրապետականներին հրաժարվել քրդամետ ժողովրդադեմոկրատների հետ ցանկացած համագործակցությունից՝ անվանելով քրդերին «ահաբեկիչներ»:
«Այս ահաբեկիչների հետ միասին մի՛ գործեք: Պարոն Քեմալը (Ժողովրդահանրապետական կուսակցության նախագահ Ք. Քըլըչդարօղլուն-tert.am) ուս ուսի է քայլում նրանց հետ», - ասել է երկրի ղեկավարը:
Թուրքիայում ՏԻՄ ընտրությունները նշանակված են մարտի 31-ին: