«Այս հայրենիքը ձեր հոր սեփականությունը չէ». Փայլանը՝ Թուրքիայի իշխող կուսակցությանը
Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի՝ Դիարբեքիրից ընտրված պատգամավոր Կարո Փայլանը Twitter-ի իր էջում հայտարարել է, որ Թուրքիայում մարտի 31-ին կայանալիք ՏԻՄ ընտրությունները կապացուցեն իշխանություններին, որ այդ երկիրն «իրենց հոր սեփականությունը չէ»:
«Մարտի 31-ին դուք կհասկանաք, որ այս հայրենիքը ձեր հոր սեփականությունը չէ, ձեր կուսակցության սեփականությունը չէ», - գրել է Փայլանը:
Նման կերպ պատգամավորն արձագանքել է իշխող «Արդարություն և զարգացում» կուսակցության՝ Յոզղատ նահանգի Բողազլըյան շրջանի ղեկավարի այն հայտարարությանը, թե ոչ ոք բացի իրենցից իրավունք չունի գործարանների տնօրեններ նշանակել:
Փայլանը նաև հայտնել է, որ իրենց կուսակցությունը, չնայած իշխանության կողմից առկա լուրջ ճնշումներին, շարունակում է նախընտրական քարոզչությունը:
«Չնայած բոլոր ճնշումներին՝ վստահ կերպով ոտքի վրա կանգնած ենք: Անպայման հաղթելու ենք», - նշել է հայազգի պատգամավորը:
ՏԻՄ ընտրությունները Թուրքիայում նշանակված են մարտի 31-ին: