«Ինչի՞ց եք հիստերիա բարձրացնում». Արևմուտքի հետ մերձեցումը Ռուսաստանի հետ ունեցած խնդիրների հետևանք է. Լուկաշենկո
Բելառուսի նախագահ Ալեքսանդր Լուկաշենկոն հայտարարել է, որ Ռուսաստանի հետ տնտեսական հարաբերություններում առկա խնդիրներից ելնելով էլ իրենք ստիպված են համագործակցություն զարգացնել Արևմուտքի հետ, գրում է «ՌԻԱ Նովոստի» գործակալությունը:
«Արևմուտքում այդ համագործակցությունն ինչ-որ ալերգիա և անգամ հիստերիա է առաջացնում մեր գլխավոր գործընկերոջ՝ Ռուսաստանի Դաշնության մոտ, առանձին քաղաքական գործիչների մոտ: Հարց է առաջանում, ինչի՞ց եք հիստերիա բարձրացնում: Մեր արտադրանքը շուկա չեն թողնում, անվանում են ձրիակեր, դուրս են մղում շուկայից, ճնշում՝ որտեղ կարող են: Մենք, ի՞նչ է, պետք է թաքնվենք շրիշակի տակ և այնտե՞ղ մնանք», - ասել է Բելառուսի նախագահը՝ շեշտելով, որ եթե ՌԴ-ի հետ լինեին նորմալ ու իրենց բավարարող տնտեսական հարաբերություններ, ապա Բելառուսը ստիպված չէր լինի «փնտրել իր երջանկությունը հեռուներում»:
Միևնույն ժամանակ Լուկաշենկոն շեշտել է, որ Եվրամիությունն իր հերթին պետք է գիտակցի, որ իրենց ազգային շահերին հակասող ցանկացած գաղափար Բելառուսի համար անընդունելի կլինի:
Լուկաշենկոյի խոսքով՝ ԵՄ-ի հետ «Արևելյան գործընկերության» ծրագրում հետզհետե սկսում են հայտնվել Բելառուսին հետաքրքրող նախագծեր: